DILI, 28 dezembru 2022 (TATOLI)— Komandante Jerál Polísia Nasionál Timor-Leste (PNTL), Komisáriu Polisia Faustino da Costa, informa Komandu PNTL foti ona medida hodi halo prosesu ba membru PNTL ne’ebé destaka iha Serbisu Nasionál Intelejénsia (SNI) ne’ebé deskonfia halo agresaun fíziku hasoru pesoál saúde ka medika na’in-rua iha sala Emerjénsia Hospitál Nasionál Guido Valadares (HNGV).
Kazu ne’e akontese iha loron sábadu (24/12), tuku 3:00, madrugada, tanba mosu dezentedimentu entre membru PNTL ne’e ho pessoál saúde ne’e iha sala Emerjénsia.
“Kona-ba kazu ida ne’e, keixa ofisiál seidauk iha, maibé Komandu PNTL prosesa ona liuhosi despaisu ba Diresaun Justisa no Disipliñar no Departementu Investigasaun Kriminál (DIK) atu haree kazu ne’e,” Komisáriu Polísia ne’e hateten iha kuartél jerál PNTL, Caicoli, kuarta ne’e.
Iha biban hanesan, Portvós Komandu Jerál PNTL, Superintendente Xefe Polisia Arnaldo Araújo, hahú prosesa ona membru hosi SNI ho NUC auto partisipasaun 0200/2022.
“Prosesu la’o ona ne’ebé ita hein de’it rezultadu mak bele fó sai,” nia afirma.
Hataan kona-ba sidadaun ne’ebé espalla informasaun iha rede sosiál Komandante Arnaldo, hateten PNTL sei bolu hotu hodi mai presta nia deklarasaun iha Komandu Jerál liga ho nia informasaun ne’ebé nia pasa
“Ha’u hanoin ida ne’e sei bolu hotu kuandu to’o ona iha prosesu laran ka to’o ona iha investigasaun nia laran. Ema ne’ebé maka espalla informasaun ba iha media ne’e ita sei bolu hotu atu bele hatene kona-ba kronolójia loloos”, katak.
HNGV seidauk hato’o keixa ba PNTL
Diretór Ezekutivu Hospitál Nasionál Guido Valadares, Alito Soares reforsa katak iha prosesa foti dadus hodi entrega keixa ba parte kompetente sira atu halo investigasaun ba kazu ne’e.
“Kazu ne’e seidauk submete ba autoridade polisiál tanba doutora ne’ebé hato’o keixa ne’e iha momentu ne’eba nia pai-mate entaun sei fó tempu ba doutora atu bele akompaña prosesu funebre ba nia pai, hafoin bele hato’o relatóriu medika ka kronolojia atu nune’e konsellu diretivu foti asaun hodi hato’o keisa”, nia afirma.
AMTL kondena hahalok agresaun fíziku
Entretantu, Asosiasaun Médiku Timor-Leste (AMTL) ejize ba HNGV no Ministériu Saúde, ne’ebé hanesan entidade patronal atu akompaña no haree médika nain-rua ne’ebé sai vitima ba agresaun fizika no insultu.
“Aprezenta keisa krime ba Ministériu Públiku kona-ba individu ne’ebé prátíka agresaun fíziku no insultu hasoru médika nain-rua, bainhira sira nian-rua hala’o hela kna’ar públiku iha servisu emerjénsia HNGV”, Portavoz AMT, Rui Maria de Araújo, hateten liuhosi konferénsia imprensa iha sede AMTL-Bidau.
AMTL husu ba MS no HNGV atu hadi’a jestaun servisu ospitalar iha HNGV, hodi bele hamosu kondisaun servisu ne’ebé kondusivu ba prestasaun servisu médiku ho kualidade no hamosu kondisaun seguransa ne’ebé di’ak liután ba funsionáriu sira ne’ebé hala’o kna’ar iha fatin sira ho risku, hanesan servisu emerjénsia HNGV.
AMTL mós kondena hahalok agresaun fíziku insultu husi individu ida ne’ebé pertense ba órgaun Estadu responsável ba orden no seguransa públika, hasoru médika na’in-rua ne’ebé hala’o hela kna’ar iha servisu emerjénsia Hospitál Nasionál Guido Valadares (HNGV).
“Independentemente husi se maka iha razaun, ka se maka laiha razaun, violénsia ka agresaun fízika no insultu la’ós dalan atu rezolve diferensa ka deskontentamentu ruma ne’ebé mosu iha servisu públiku sira, no labele hetan fatin iha Estadu Direitu Demokrátiku, ne’ebé Povu Timor-Leste rasik maka konkista liuhusi luta naruk Libertasaun Pátria. Sá tan, hahalok agresaun fíziku no insultu sira ne’e, mai fali duni husi individu ne’ebé tuir loloos tenke mantein, no sai garante ba seguransa no orden públika”, nia lamenta.
AMTL apela mós ba profisaun saúde sira seluk, atu nafatin servisu hamutuk ho médiku sira, hanesan ekipa ida, hodi lori prestasaun saúde di’ak liutan ba Povu Timor-Leste, no bele alkansa vizaun bo’ot “Timor-oan saudável iha Timor-Leste ida ne’ebé saudável’’.
Jornalista : Natalino Costa/Felicidade Ximenes
Editór: Florencio Miranda Ximenes
