VIQUEUQUE, 29 dezembru 2022 (TATOLI)–Diretór Servisu Apoiu Sosiadade Sivil (DSASS) iha munisípiu Viqueque, Cosme Carmento, husu ba Xefe suku sira atu submete lista reklamante subsídiu fim do ano $200, tanba daudaun pagamentu iha munisípiu Viqueque termina ona.
“Ita finaliza ona pagamentu subsídiu $200, maibé agora foin suku rua mak submete lista reklamante, tanba ne’e husu ba Xefe suku sira hodi submete lista reklamante,” Diretór informa ba Agência Tatoli, iha Administrasaun munisipál, kinta ne’e.
Notísia relevante: Governu halo ona pagamentu subsídiu $200 ba uma kain 295.300
Nia dehan, lista reklamante hosi suku Matahoi, postu administrativu Uatulari lori direta ba nasionál, maibé suku seluk nia lista reklamante seidauk.
“Ohin ami simu tan lista reklamante hosi suku Afakoikai, dadus benefisiáriu 1.227 no reklamante 69. Iha oportunidade ida-ne’e, ha’u hakarak husu ba suku sira hodi rekolla lalais lista reklamante hodi mai submete iha gabinete munisípiu Viqueque. Lista ne’e liu tinan foun tenke tama hotu ona,”nia hato’o.
Benefisiáriu ba programa ne’e maka agregadu família sira ne’ebé rejistu ona to’o loron 28 fevereiru 2022 iha livru rejistu uma-kain, ne’ebé daudaun ne’e iha territóriu nasionál no laiha elementu ida mak simu rendimentu fulan ho forma regulár hosi servisu instituisaun públika ka entidade privada, rendimentu emprezariál, rendimentu prediál ka rendimentu sira ne’ebé hetan hosi prestasaun sosiál liuhosi rejime kontributivu, la kontributivu, ka espesiál, ne’ebé ninia valór a’as liu $500.
Jornalista : Vitorino Lopes da Costa
Editora : Julia Chatarina
