DIiLI, 05 janeiru 2023 (TATOLI) – Hospitál Nasionál Guido Valadares (HNGV), liuhosi Departamentu Banku Sangue, iha 2022, rejista ema ne’ebé fó doasaun raan hamutuk 4.667.
“Janeiru to´o dezembru 2022, ami halo teste ran ba ema 6.072, husi númeru ne’e, sira ne’ebé halo doasaun raan hamutuk 4.667 no restu balun la konsege kontribui ran no balun iha moras”, Xefe Departamentu Banku Sangue, Januario da Cruz Freitas, ba jornalista sira iha HNGV, ohin.
Januario friza dezde 2022, iha janeiru totál doadu ba ran 379, fevereiru 405, marsu 469, abríl 412, maiu 400, juñu 430, jullu 368, agostu 391, setembru 421, outubru 387, novembru307, no dezembru 298.
“Ita iha ne’e halo teste ba moras hepatitis B, C, sifilis no HIV SIDA, agora iha 2022 hepatitis B hamutuk 232, hepatitis C 15, sifilis 161, HIV SIDA 57, númeru sira ne’e ema ne’ebé mak mai teste raan hafoin ami identifika sira-nia moras”, nia afirma.
Dezde 2022, ema voluntáriu hodi kontribui ran hamutuk 1.829 no mai hosi família ho totál 2.838, maske nune´e ema barak mak seidauk hatene kona-ba doasaun ran, tanba ne´e ema sei menus.
“Ema ne’ebé mak doasaun raan voluntariu durante tinan ida ne’e hamutuk 1.829 no mai husi familia hamutuk 2.838”, Ezekutivu ne’e relata.
Husi doasaun ran, grupu ran O+ mak nafatin domina iha 2022 hamutuk 2.105, tuir mak A+ 1.218, B+1.074, no menus liu mak AB+ 270 maibé ran hirak ne’e uza hotu hodi halo tratamentu saúde ba ema ne’ebé mak presiza ran.
Jornalista : Felicidade Ximenes
Editór : Zezito Silva
