Autoridade aloka rihun $4-resin reabilita fatin turístika haat iha Pante Makasar
OÉ-CUSSE, 05 janeiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, aloka rihun $4,113 hosi Orsamentu Estadu 2022 nian hodi dezenvolve fatin turíztika haat iha sub-rejiaun Pante Makasar.
Fatin turístika haat ne’e iha pertense ba suku Costa maka hanesan, jardín arte pinta moru lokaliza iha bairru Palaban, aldeia Sanane, no jardín koreanu lokaliza iha bairru Oébau, aldea Sanane
Nune’e mós ba fatin turístika relijioza rua ne’e mak hanesan, Fatu-Suba lokaliza iha bairru Sikluli, aldeia Sanane no gruta Santu António Polsiba lokaliza iha bairru Meok-Ana, aldeia Oésono.
Prezidente Autoridade RAEOA, Arsénio Paixão Bano, informa, prosesu konkursu públiku iha ona rezultadu ba empreza manán iha ona, no daudaun ne’e serbisu kontinua la’o ona, espera empreza bele aselera nia progresu tuir termu kontratu ne’ebé prevista ona iha dokumentu kontratu.
“Fatu-Suba no gruta Santu António, koñesidu nu’udar fatin istóriku iha Oé-Cusse, tanba dezde bei-ala sira hosi jerasaun ba jerasaun baibain halibur komunidade no juventude sira mai hosi lokál, nasionál no internasionál inklui partidu polítiku uza fatin ne’e hodi sunu lilin husu matak malirin no orasaun, entaun autoridade deside prezerva fatin sira-ne’e,” Arsénio Paixão Bano informa ba Agência Tatoli, kinta ne’e.
Aliende ne’e mós, kada tinan tinan hetan ona vizita barakliu hosi komunidade iha suku 18 iha Oé-Cusse mai vizíta beibeik iha fatin ne’e, entaun autoridade hakarak transforma sai fatin istória ne’e sai fatin turístika ba relijioza, kulturál ba povu Oé-Cusse no Timor-Leste.
“Ita tenke halo di’ak no furak liután tanba fatin primeiru istória ba relijiaun Kátolika, agora daudaun autoridade konstrui ona fatin turizmu ba kulturál iha Nunuhenu,” nia afirma.
Autoridade ne’e fó-sai katak, fatin ne’e autoridade harii la’ós ba Oé-Cusse maibé ba povu Timor-Leste, tanba família balu mai hosi nasaun viziñu no rai boot, mai sunu-lilin, mai husu orasaun, inklui partidu polítiku sira, tanba ne’e autoridade iha obrigasaun atu hadi’a fatin ne’e.
“Jardín Arte Pinta Moru no jardín koreanu lokaliza, ne’e hanesan mós fatin bainbain halibur joven sira, soldadu mate iha Oé-Cusse iha 2003 bainhira mai salva povu Timor-Leste hafoin ukun-aan, entaun fatin sira-ne’e ita tenke hadi’a ba jerasaun sira mai labele haluha,” nia katak.
Projetu fatin turístika haat ne’e ezekuta hosi empreza lokál Maysalu Unipesoál, Lda, ho valór kontratu hamutuk rihun $4,113, Autoridade RAEOA prevee hosi Orsamentu Jerál Estadu (OJE) 2022 nian ho durasaun serbisu durante fulan-haat.
Jornalista: Abílio Elo Nini
Editór: Evaristo Soares Martins
