HNGV asegura jeradór tolu hodi halo atendimentu ba pasiente sira bainhira eletrisidade mate
DÍLI, 05 janeiru 2023 (TATOLI) – Diretór Administrasaun Finansa no Lojístika, iha Hospitál Nasionál Guido Valadares (HNGV), Raul Humberto Gama, dehan ospitál asegura jeradór tolu hodi halo atendimentu ba pasiente sira bainhira eletrisidade mate iha Munisípiu Dili.
“Foin daudaun ita iha problema duni ba liña eletrisidade tanba ita hatene anin boot, ai tohar maibé ita iha jeradór tolu para bainhira eletrisidade husi EDTL mate ita asegura ho funsionamentu jeradór atu halo atendimentu ba ita nia pasiente sira iha ospitál”, Raul, informa ba jornalista sira iha nia kna’ar fatin, ohin.
Loloos HNGV iha jeradór haat maibé ida boot ne’ebé fornese husi EDTL nia kondisaun avaria ho kapasidade 1.2 mega hertz tanba ne’e agora daudaun uza hela jeradór kiik, nia kapasidade kada jeradór ne’e 250 mega hertz atu oinsá asegura bainhira eletrsidade mate.
“Jeradór bo´ot ida ne’e, tuir enkontru iha semana kotuk HNGV hamutuk ho EDTL halo ne’e, ita sei hadia iha tempu badak nia-laran, maibé ita sei halo ezersísiu ba orsamentu, tanba iha planu ita la tau orsamentu ba manutensaun ba jeradór husi EDTL nian”, revela.
Nune’e, Eletrisidade Timor Leste (EDTL) promete iha tempu badak nia-laran sei fornese no hatama tan feeder foun mai iha HNGV, tanba feeder ida de´it.
Jornalista : Felicidade Ximenes
Editór : Zezito Silva
