MAP Bobonaro sei apoia tratór atende natar ektare 160
BOBONARO, 06 janeiru 2022 (TATOLI) – Ministériu Agrikultura no Peska (MAP) liuhosi diresaun servisu agrikultura munisípiu Bobonaro sei apoia tratór boot rua ho marka ‘Rotary’ atu halo atendimentu ba natar ektare 160 ba agrikultór sira-ne’ebé sai benefisiáriu hosi programa ‘Deam Área’ ba époka 2023 nian.
Diretór Servisu Agrikultura Munisípiu Bobonaro, Alberto Gomes Lopez, fundamenta, diresaun ne’e iha tratór hamutuk 35. Hosi númeru ne’e iha tratór 16 de’it mak sei bele halo operasaun no hosi unidade ne’e só bele autoriza utiliza de’it marka ‘Rotary halo operasaun iha natar laran.
Notísia relevante: MAP husu komunidade Bobonaro kolabora dezenvolve área kultiva
“Ita-nia tratór iha haat, maibe rua aat, labele uza tanba rolamentus rahun hotu, entaun iha rua de’it prepara halo atendimentu, komesa ohin ita hahú halo atendimentu, tanba ita iha programa liuhosi Ministériu Agrikultura no Peska, programa ida naran ‘Deam Área’ ne’e iha natar ektare 160 ba tinan ida-ne’e,” nia informa ba jornalista sira, iha Maliana.
Diretór Alberto, akresenta benefisiáriu sira-ne’ebé tama iha ektare 160 ne’e hakarak no prontu ona atu kumpre tékniku prátika agrikultór ho di’ak, hodi atinje polítika MAP nia katak tinan ne’e tenke hasa’e produsaun agríkola
“Ita sei atende hotu natár-nain sira, tanba daudaun ne’e ita-nia kombustívél gratuitu ne’e seidauk to’o mai, maske iha limitasaun maibé ita nafatin esforsu halo atendimentu hodi responde ba agrikultór sira-nia preokupasaun,” nia hatutan.
Nia subliña, komubustível gratuita ne’e mós sei fó prioridade liu ba benefisiáriu sira-ne’ebé konsidera hanesan kbiit laek, defisiénsia no faluk.
Alberto hatutan, daudaun ne’e prepara ona hare-fini iha armazein Tunubibi purvolta tonelada 22 ba natar ektare 160 ne’ebé pertense ba postu administrativu Atabae, Balibo, Cailaco, Maliana, Bobonaro no Lolotoe.
“Orden tún ona, semana ne’e distribui ona ba postu, tanba tempu ona ema halo viveiru, ne’ebé agrikultór sira tenke hahú book-aan ona,” nia katak.
Maibe diretór ne’e dehan, ba oin governu presiza aumenta tán Tratór ‘Rotary’ unidade 10, tanba agrikulltór sira maioria hakarak uza tanba tipu tratór ne’e halo serbisu fila-rai dala ida de’it no lais inklui hafasil atu kari hare-fini no kuda.
“Situasaun no kondisaun mínima sira ne’e, ami informa ona ba nasionál atu buka alternativa no solusaun, maske ita iha limitasaun tratór, ita nafatin halo atendimentu tanba sasán ne’e iha ba sira, kuandu atende mak to’o aat mak ita foin enfrenta,” nia hateten.
Notísia relevante: CITL-MAP konsulta área Hidrografia ho autoridade Bobonaro
Jornalista : Sérgio da Cruz
Editór : Evaristo Soares Martins
