Profisionál saúde menus fasilidade iha baze
BAUCAU, 06 janeiru 2023 (TATOLI) – Profisionál saúde destakadu sira iha sentru no postu saúde iha munisípiu Baucau maioria menus fasilidade hodi hala’o atendimentu ba komunidade iha baze.
Diretór Serbisu Munisipál Saúde Baucau, Domigos Reinaldo da Costa Guterres, esplika, ministéru saúde destaka kada pesóal saúde iha postu no sentru saúde hanesan parteira, enfermeira, médiku no tekniku aliadu sira maibé difikuldade ne’ebé enfrenta mak fasilidade hanesan rezidénsia hodi hela inklui transporte hodi atende komunidade iha baze.
“Kada tinan ita planu hakarak halo uma kompleta ho fasilidade sira maibé difisil oituan, depende ba orsamentu hosi munisípiu no nasionál,” Diretór Serbisu Munisipál Saúde hateten iha vila antiga, sesta ne’e.
Pesoál saúde sira-ne’ebé destakadu iha área rúral balun la’ós rai-na’in nune’e utiliza uma komunidade hodi deskansa no balun tenke fila uma kada loron ka semana ho distánsia ne’ebé dook.
Munisípiu Baucau iha postu saúde Liabala, Venilale no postu Bualale, Quelicai mak fasilidade kompleta ona ho uma ba pesoál saúde hodi hela no halo atendimentu ba komunidade.
Ministériu Saúde (MS) serbisu hamutuk ho Ministériu Administrasaun Estatal (MAE) liuhosi akordu hodi fasilita fatin inklui tau matan no kontrolu hosi autoridade lokál ba profisionál saúde ne’ebé destaka iha sentru no postu saúde sira baze.
“Kuandu iha fallansu ita fó xamada, husu tuir kona-ba razaun pesoál saúde abandona serbisu,” Domingos Guterres akresenta.
Totál sentru saúde iha Baucau hamutuk sia komposta hosi Servisu Saúde Baucau Uailili, Laga, Vemase, Venilale, Quelicai, Baguia, Riamare, Bucoli no postu saúde hamutuk 29 inklui klínika veteranu hamutuk 30 ho totál profisionál saúde hamutuk na’in-354.
Jornalista : Natalino Belo
Editór : Evaristo Soares Martins
