OÉ-CUSSE, 09 janeiru 2023 (TATOLI) – Servisu Diresaun Rejionál Edukasaun Rejiaun Administrativa Espesiál Oé-Cusse Ambeno (RAEOA), daudaun ne’e seidauk iha ajenda fiksa ba implementasaun programa merenda eskolár tinan 2023 nian tanba sei hein alokasaun orsamentu hosi Ministériu Finansa (MF).
Xefe Departamentu Apoiu Asaun Sosiál Eskolár iha RAEOA, Domingos Ramos Tebi, hatete, tinan ne’e programa merenda eskolár iha sei iha mudansa tanba antes ne’e kada estudante hetan sentavu $0,25 atu hasa’e ba sentavu $0,42, maibé nia parte sei hein orientasaun hosi Ministériu Edukasaun, Juventude no Desportu (MEJD).
“Tuir loloos implementa ona iha janeiru ne’e, ami sei hein alokasaun orsamentu hosi Ministériu Finansa mai RAEOA, hanesan bainbain ami sei aprezenta proposta ba Sekretaria Rejionál ba Asuntu Finansa, kuandu iha ona aprovasaun, maka foin ezekuta programa merenda eskolár ne’e,” Domingos Ramos Tebi, ko’alia ba Agência Tatoli iha Oé-Cusse, segunda ne’e.
Nia afirma, tinan ne’e mantein implementasaun programa merenda eskolár ba eskola 84 iha territóriu Oé-Cusse mai hosi Ensinu Báziku (EB) hamutuk 72 no edukasaun pré-eskolár hamutuk 12.
Maske xefe departementu ne’e la esplika detalla kona-bá montante orsamentu iha proposta merenda eskolár ba tinan 2023 ne’e, maibé nia dehan, kada implementasaun kabe ba trimestre nian.
“Nia orsamentu implementasaun ne’e kada trimestre fulan tolu hahú janeiru to’o marsu, maibé karik orsamentu sai fali iha marsu entaun ita adianta ba abríl to’o juñu,” nia afirma.
Xefe departamentu ne’e akresenta, bainhira alokasaun orsamentu to’o ona iha RAEOA maka servisu edukasaun sira sei realiza enkontru konjunta ho ekipa jestaun programa merenda eskolár sira mai hosi eskola hotu, komposta hosi koordenadór ida, tezoreira ida no pontu fokál na’in-tolu (3) tanba sira mak sei jere rasik osan ba merenda nian.
Jornalista: Abílio Elo Nini
Editór: Evaristo Soares Martins
