2022: MS deteta pasiente TB besik rihun-lima iha teritóriu
DILI, 10 janeiru 2023(TATOLI) – 2022 Ministériu Saúde liuhosi Programa Tuberkoloze Nasionál konsegue deteta pasiente tuberkoloze besik rihun-lima iha teritóriu nasionál.
“Bazea ba Primeiru-Ministru, Taur Matan Ruak, nia deklarasaun no kompromisu iha fulan setembru 2021 katak atu elimina moras TB iha tinan 2025, entaun ho ida ne’e ami halo escrening tama uma sai uma buka pasiente TB ho mákina ginne expert, ne’ebé mak durante instala ona iha munisípiu hotu ho rekursu sira ne’ebé mak ami koloka, deteta kazu tuberkoloze iha tinan 2022 besik 5.000”, Xefe Programa Tuberkoloze Nasionál, Constantino Lopes, dehan ba TATOLI iha Hotel Novo Turismo, ohin.
Pasiente besik rihun-lima, sira iha hela tratamentu nia-laran signifika 90 % di´ak ona tanba tratamentu tuberkoloze to´o fulan-neen.
“Hahú ami hala´o programa ne’e, ami deteta rihun-tolu no rihun-haat mai kraik maibé ba tinan 2022 ami deteta kazu barak tanba ami hahú halo treinamentu ba tékniku sira, entaun sira iha kapsidade di´ak oinsá atu identifika, geografikamente ne’e difisíl tebes maibé, sira sempre lao nafatin sa’e foho hakat mota buka kazu sira ne’e”, Nia afirma.
Xefe Programa ne’e esplika pasiente sira ne’ebé afeta tebes ba moras tuberkoloze mak idade produtivu husi 15 to´o 54 entaun 72% afeta ba moras ida ne’e, liuliu mane tanba hahalok risku hanesan fuma hemu alku ida ne’e mak sai kontribui ba moras refere.
Nia esplika atu hadook husi moras tuberkoloze mak banhira sinál sintomas iha ona hanesan mear depois han vontade la iha ida ne’e bele hakbesik an lalais ba fasilidade saúde no minimiza fuma hemu alku.
Jornalista : Felicidade Ximenes
Editór : Zezito Silva
