OÉ-CUSSE, 10 janeiru 2023 (TATOLI) – Diretór Edukasaun Rejiaun Administrativa Espesiál Oé-Cusse Ambeno (RAEOA), Daniel Mauno, informa, tempu badak parte edukasaun sei hadi’a eskola emerjénsia tolu, edifísiu rua no armazein ida tanba afeta hosi dezastre naturál.
Daniel Mauno rekoñese dezastre naturál ne’ebé akontese afeta ba edifísiu eskola sira iha Oé-Cusse, hanesan Bilele Maunaben, suku Cunha, Pante Makasar, akontese monu tanba afeta hosi anin akompaña ho udan ne’ebé maka’as, entaun eskola monu.
Nune’e mós akontese iha fatin seluk hanesan eskola Báziku Fíliál Binibu Faefnome iha suku Usitasa’e, sub-rejiaun Oésilo, akontese bee-dalan kona loos edifísiu eskola difikulta prosesu aprendizajen nian. Nune’e mós akontese ba eskola Báziku Filiál Mahata, suku Costa, Pante Makasar, anin hú monu kalen sira iha iha edifisiu ármazein nian.
“Eskola Bilele, ita-nia pesoál inspetór sira to’o ona iha fatin, atu levanta dadus, tanba iha-ne’ebá ne’e ita sei halo uma ba emerjénsia tanba eskola ne’e presiza duni fatin di’ak ba estudante sira atu hala’o prosesu aprendizajén,” Daniel Mauno, hatete iha Oé-Cusse, tersa ne’e.
Nia hatutan, hosi parte planu edukasaun Oé-Cusse sei fó atensaun másimu ba kondisaun eskola refere, atu oinsá bele hadi’a fatin ho klasifikasaun emerjénsia hodi fasilita profesór no estudante sira asesu ho kondisaun dignu ba prosesu ensinu aprendizajen.
Kona-bá EBF Binibu Faefnome, daudaun ne’e parte edukasaun koopera ona ho autoridade komunitáriu sira no inan-aman sira, atubele provizoriamente desvia tiha bee-dalan, bainhira akontese udan labele hetan tán dezastre hanesan daudaun ne’e.
“Eskola ne’e ita konsidera projetu boot, entaun ita rejista ba planu anuál ninian, depois ita konstrui bee-dalan ne’ebé iha atu labele kona tán edifísiu eskola nian,” nia katak.
Ba fali EBF Mahata mós hanesan, uma armazein hetan sobu hosi anin, entaun pesoál sira levanta ona dadus no halo kedas atuasaun imediata, tanba iha armazein laran sasán eskola sira iha inklui foos.
“Entaun ne’e ita tenke atua imediata, atu oinsá kalen sira bele hadi’a fila-fali, nune’e labele estraga sasán sira iha armazein laran,” nia afirma.
Jornalista : Abílio Elo Nini
Editór : Evaristo Soares Martins
