Família matabian Isac Sinarai lamenta deklarasaun Xefe Kaza Militár Interinu

DILI, 11 janeiru 2023 (TATOLI) – Aman hosi matebian Isac Sinarai da Costa, lamenta ho deklarasaun Xefe Kaza Militár Interinu Prezidénsia Repúblika, Majór Francisco da Siva, tanba hateten matebian hetan oho hosi ema deskoñesidu ho motivu envolve iha Ikatan Kera Sakti Putra Timor-Leste (IKS-PTL) ne´ebé afilia ba Organizasaun Arte Rituál 77.
“Família deside halo konferénsia imprensa ida ne’e tanba relasiona ho deklarasaun hosi xefe kaza Militár ne’ebé hateten iha Palasiu Prezidensiál katak ami nia oan mate tanba envolve iha arte marsiál. Hanesan aman sente triste ho deklasaun ida ne’e, tanba ne’e husu atu bele dada fali ninia dekasaun ida ne’e. Tanba xefe kaza militár momentu fó nia deklarasaun ba públiku hanesan portavós Prezidente Repúblika”, Florentino Ximenes da Costa Sinarai, ba jornalista sira liuhosi konferénsia imprensa ne’ebé hala´o iha uma Matebian Delta 4, Kuarta ne’e.
Sinarai konsidera deklarasaun ne’ebé hato’o hosi xefe kaza militár prezidénsia repúblika ne’e la relevante no la tuir kodisaun matebian nian. Tanba matebian la envolve iha Grupu Arte Marsiál durante nia moris.
“Ha’u nia oan ne’e ha’u maka eduka, ha’u maka hatene nia atu tama arte marsiál ka la´e, tanba há´u mak hatene liu“, Nia afirma.
Sinarai refere atu lori deklarasaun hosi xefe kaza militar tuir prosesu legal.
“Hanesan aman ha’u mós atu hateten katak depois deklasaun ida ne’e hein hela advogadu atu lori Señor Xefe Kaza Militár ne’e ba parte justisa nian”, revela.
Aman hosi Matabian ne’e husu ba autoridade polisiál atu kontinua buka autór ne’ebé oho ona matebian Isac Sinarai.
“Husu ba PNTL atu kontinua buka autór ne’ebé halo asasinatu hasoru matabian Isac Sinarai da Costa to’o lakon nia vida, nune’e autór bele detein lalais atu prosesa tuir dalan legál”, katak.
Iha fatin hanesan, Sekretariu Jerál Organizasaun GAM Ikatan Kera Sakti Putra Timor-Leste (IKS-PTL), Samuel Guterres, dezmete ho informasaun ne’ebé maka hosi xefe kaza militár prezidénsia repúblika hato’o ba públiku liuhosi mídia.
“Deklarasaun ne’ebé maka Xefe Kaza Militar Majór Francisco da Silva hato’o ne’e permatur ka sedu liuhosi ami nia haree, tanba rezultadu hosi kazu ómesidiu ne’ebé halakon matebian Isac Sinarai seidauk sai, maibé señor Xefe Kaza Militár fó sai uluk ona, mai ami ne’e permatura liu”, rekoñese.
Nia mós klarifika ba públiku katak matabian Isac Sinarai da Costa la´os membru Ikatan Kera Sakti Putra Timor –Leste (IKS-PTL) .
“Tanba ami nia membru IKS-PTL ne’ebé rejista ida nível tuan no foin sai warga IKSS no estudante foun ne’e ami hatene malu no kontrola malu, ne’ebé matebian ne’e laos ami nia membru”, informa.
Reprezemtante GAR 77, Teotonio Macodo, rejeita katak matebian Isac Sinarai la´os membru organizasaun arte rituál 77.
“Ami kondena tebes ho deklarasaun xefe kaza militár prezidénsia repúblika ne’ebé hateten matebian Isac Sinarai da Costa mate tanba problema arte marsiál tanba nia hosi organizasaun arte marisiál IKS maka mai fali 77 ne’e la laos no matebian la´os ami nian membru 77”, dehan Nia.
Nune’e mós Xefe Aldeia São José, José Muca Sana, hateten durante ne’e matebian nia aman to’o matebian rasik laiha problema ema ruma iha aldeia ne’ebé sira hela ba.
“Durante matebian nia aman no sira hotu hela iha ne’e nein halo problema ho ema ruma iha aldeia ne’’e”, katak.
Nia dehan matebian Isac Sinarai da Costa hanesan joven ne’ebé di’ak iha Aldeia São José, nunka iha problema ho ema ruma.
“Tanba ne’e hanesan autoridade iha aldeia ne’e nia husu atu polísia buka tuir autór ne’ebé hakotu ona ami nia joven ne’e nia vida hodi hatan ba nia aktu sira, tanba sa maka nia halo ida ne’e”, konklui.
Notísia relevante: Xefe Estadu konvoka reuniaun KSDS ba kazu timoroan oho malu
Jornalista: Natalino Costa
Editór : Zezito Silva

