MEJD observa kondisaun eskola EBC Bere-Mau iha Tapo-Memo
BOBONARO, 12 janeiru 2023 (TATOLI) – Ministru Edukasaun, Juventude no Desportu (MEJD), Armindo Maia, akompaña hosi Vise Ministru Administrasaun Estatál, Lino de Jesus Torrezão, kinta ne’e observa direita kondisaun eskola Ensinu Báziku Sentrál, Bere-Mau iha suku Tapo-Memo, postu administrativu Maliana, munisípiu Bobonaro.
Iha observasaun durante menutu 5 ne’e akompaña hosi Prezidente Autoridade Munisípiu Bobonaro Ernesto de Oliveira Barreto, Ministru Armindo haree ho matan kona-ba kondisaun infraestrutura eskola sira hanesan meza ho kadeira no sala aula balun didin no janela hahú nakles.
Nune’e mós sala tolu konstrui liuhosi Projetu pakote Referedu (PPR) ne’ebé didin de’it ho bebak no daudaun ne’e nia kondisaun ladún di’ak ona.
Notísia relevante: MEJD planeia konstrui sala aula 400 iha 2023
“Aponta hela ba depois mak ita haree took halo nusá, karik bele problema kiik sira-ne’e imi uza osan konsensaun eskolár nian hadi’a ne’e la boot ida, la presiza hein nasionál,” Ministru Armindo, ko’alia durante halo observasaun ba kondisaun eskola refere, iha Tapo-Memo, kinta ne’e.
Adjuntu Diretór EBC Beremu-Mau ,Crisyanto do Nascimento, esplika eskola ne’e enfrenta problema sala aula balu kondisaun la di’ak, meza no kadeira la sufisiente.
“Sala aula tolu ida iha sorin ne’e, estudante sétimu ho oitavu mak atu uza, maibé udan estudante sira tur ladi’ak, ami sai fali, kona-ba karteira eskolár foin daudaun ami mós hatama proposta hotu, maibe la simu,”Adjuntu-diretór EDC ne’e ne’e informa ba Ministru Armindo Maia.
Totál estudante EBC Bere-Mau iha sala ualu akomula estudante hosi primeiru-anu ho terseiru siklu hamutuk na’in-690 no profesór hamutuk 19 komposta hosi permanente no kontratadu.
Notísia relevante: EBC Beremau iha suku Tapo-Memo laiha profesór lian inglés
Jornalista : Sérgio da Cruz
Editór : Evaristo Soares Martins
