Ministériu Saúde rekoñese fasilidade saúde iha baze menus
BAUCAU, 12 janeiru 2022 (TATOLI) – Ministériu Saúde rekoñese fasilidade saúde hanesan infraestrutura no rezidénsia ba profisionál saúde destakadu sira iha baze sei menus nune’e fó impaktu ba atendimentu komunidade iha área rurál.
Vise-ministru saúde, Bonifácio Maucoli dos Reis, hateten, infraestrutura hanesan postu saúde, klínika no rezidénsia importante ba profisionál saúde sira iha baze maibé ba fatin sira-ne’ebé seidauk konstrusaun sei kontinua fó prioridade liuhosi levantamentu dadus hosi tékniku sira hodi halo konstrusaun foun fazeadamente.
“Ne’e inportante tebes, se ita koloka pesoál saúde sira iha Baucau nia la’o-ain bainhira mak to’o? ne’e bele susar, entaun nia tenke iha fatin hodi hela nune’e bele halo tratamentu,” Vise-ministru saúde hateten iha área Caisido, suku Tirilolo, kinta ne’e.
Governante ne’e argumenta, liuhosi diploma ministeriál entre Ministériu Admistrasaun Estatal no Ministériu Saúde kona-ba delagasaun kompeténsia hanesan problema infraestrutura bele utiliza orsamentu munisipál liuhosi Planu Dezenvolvementu Integradu Munisipál (PDIM) ne’ebé dezeñu no Bill Of Quantity (BOQ) tenke foti hosi ministériu saúde nune’e bele uniformiza.
Ministériu saúde mós deside profisionál saúde sira-ne’ebé destakadu iha klínika, postu no sentru saúde iha baze tenke hosi fatin refere nune’e provizoriumemnte hela iha uma-rasik hodi hein konstrusaun rezidénsia iha futuru.
“Bainhira identifika falta médiku, enfermeiru no parteira ita kontratu maibé atu sai funsionáriu permanente, ne’e depende ba Komisaun Funsaun Públika, maibé ita kontratu tuir nesesidade ministériu nian,” Bonifácio dos Reis akresenta.
Orsamentu tinan-2023 ne’ebé aloka ba Ministériu Saúde hamutuk millaun $56 ne’ebé aloka ba kapitál dezenvolvementu hamutuk millaun $13-resin no sei fahe ba munisípiu hotu tuir prioridade no neseidade hodi konstrui postu, klínika no sentru saúde no rezidénsia.
Totál sentru saúde iha Baucau hamutuk sia kompostu servisu saúde Baucau, Uailili, Laga, Vemase, Venilale, Quelicai, Baguia, Riamare, Bucoli no postu saúde hamutuk 29 inklui klínika veteranu hamutuk 30 ho totál profisionál saúde hamutuk na’in-354.
Jornalista : Natalino Belo
Editór : Evaristo Saores Martins
