ONU reafirma kompromisu apoiu dezenvolvimentu Timor-Leste
DILI, 12 janeiru 2023 (TATOLI) – Koordenadora Rezidente Organizasaun Nasaun Unida (ONU) iha Timor-Leste, Funni Balogun, reafirma kona-ba kompromisu ONU nian hodi apoia ba dezenvolvimentu Timor-Leste.
“Ha’u mai atu reafirma ami nia kompromisu ba Xefe Governu, Taur Matan Ruak, kona-ba ami nia apoiu sira ba dezenvolvimentu nasaun ne’e nian, iha ne’e Primeiru-Ministru mós fahe informasaun kona-ba ninia prioridade, hanesan valór demokrasia mai ami”, dehan Funni Balogun, ba Agência TATOLI, iha Palasiu Governu, ohin.
Nia dehan dezenvolvimentu prinsipál ne’ebé ONU hakarak apoiu makas mak iha área nutrisaun nian, hodi nune’e bele redúz má-nutrisaun iha Timor-Leste.
“Nutrisaun importante tebes ba Governu no povu Timor-Leste atu má-nutrisaun entre labarik sira no sai hanesan programa prioridade ami nian ida atu servisu hamutuk ho Governu Timor-Leste iha tinan 2023”, revela.
Ho nune’e, OUN sei mobiliza rekursu husi ninia parseiru dezenvolvimentu sira atu lori investimentu mai Timor-Leste hodi kontribui ba redúz pobreza no má-nutrisaun iha nasaun ne’e.
Koordenadora Rezidente ONU iha Timor-Leste, hateten ONU mós hakarak hametin liután lasu amizade entre ONU ho Governu nasaun ne’e nian.
“Ohin ne’e ha’u nia enkontru primeiru ho Primeiru-Ministru, ami koalia asuntu lubuk ida kona-ba dezenvolvimentu Timor-Leste nian, koordenasaun ONU ho Governu Timor-Leste hahú kleur ona, ONU iha lasu amizade ida di’ak tebes ho Governu, relasaun ida ne’e tenke metin liután iha futuru”, salienta.
Nia dehan ONU kontinua suporta Timor-Leste la´os de’it iha restaurasaun independánsia tinan 20 liubá, maibé suporta nasaun ne’e iha área prioridade sira ne’ebé mak Governu identifika ona ne’ebé mak aliña ho implementasaun Organizasaun Dezenvolvimentu Sustentável (ODS).
“Ha’u nia vizita atu reiteira komitmentu família ONU nian ba Xefe Governu katak ONU sempre iha hodi suporta Governu no povu Timor-Leste nian iha prosesu dezenvolvimentu ba área saida de’it atu lori nasaun ne’e ba oin” nia revela.
ONU anota ona prioridade Governu Timor-Leste nian hanesan nutrisaun, stunting, investimentu, komérsiu no diversifikasaun.
Jornalista:Hortencio Sanchez
Editór : Zezito Silva
