DILI, 13 janeiru 2023 (TATOLI) – Forum Organizasaun Naun Governamentál Timor-Leste (FONTIL) husu ba Ministériu Saúde atu fó atensaun ba profisionál saúde sira iha Hospitál Nasionál Guido Valadares (HNGV), bainhira halo operasaun labele publika vítima tentativu omesídiu.
“Ami husu ba Ministériu Saúde atu tau atensaun ba médiku sira iha Hospitál Nasionál Guido Valadares (HNGV), bainhira iha vítima tentativa ema sona ba halo autopsia ka operasaun ba kazu omesídiu ka atu hasai kroat ruma iha vítima sira nia isin, hanesan tudik ka rama ambon, labele halo fali video hodi publika iha media sosiál sira, ezemplu mak kazu ida akontese BJ Habibe ida ne’e”, Ofisiál Advokasia FONTIL, Jorge Madeira, hateten liuhosi konferénsia imprensa iha FONGTIL, Caicoli, ohin.
Nia deklara iha lei kódigu penál hateten segredu lei, médiku nunka publika mais kazu ida ne’e, iha semana kotuk haree profisionál saúde sira halo operasaun sira publika fali iha plataforma média, entaun husu MS atu tau atensaun ba ida ne’e.
“Ida ne’e mak akontese beibeik presaun psikolojika ne’e ba komunidade sira katak tudik ne’e oho hanesan ne’e, hanesan ne’eba, se MS husik ida ne’e, kazu omesídiu ka suisídu ita halo operasaun iha liur de´it atu ema hotu haree”, Jorge salienta.
Tanba ne´e, FONGTIL husu ba médiku sira tenke garante konfedensialidade katak autopsia tenke iha fatin seguru tanba ne’e FONGTIL hanesan sosiedade sivíl husu labele publika ema nia privasidade.
Hatan ba preokupasaun ne’e, Diretór Klíniku HNGV, Marcelino Correia, informa HNGV bolu atensaun ba médiku sira ne’ebé mak fó sai privasidade ema nian bainhira halo operasaun tanba durante hala´o kna’ar ida ne’e médiku hotu halo juramentu.
“Ami fó ona xamada atensaun ba sira, ita iha regulamentu internu ida katak bandu sira la bele halo publikasaun bainhira laiha koñesimentu husi ema na’in, tanba ne’e ita orienta ona no fó hatene ona katak labele divulga informasaun ka video ruma pasiente sira nian ba públiku”, Marcelino Correia deklara.
Nia defende katak HNGV la fó sai video ida ne’e ba públiku maibé sira manda video ne’e ba grupu Asosiasaun Médiku Timor-Leste (AMTL) hafoin ida ne’e mak AMTL fó sai fali ba públiku liuhosi media sosiál.
“Ami husu médiku dehan sira la fó sai direta ba públiku maibé sira haruka ba Grupu AMTL nian mak ema balun ne’ebé la servisu iha HNGV mak publika fali ba media sosiál”, salienta nia.
HNGV husu ona ba profisionál saúde ba oin labele halo tan video, banhira halo operasaun nia laran, se karik sira halo tan mak sei fó sansaun administrativa, ida ne’e akontese konsellu diretivu HNGV mak sei deside, tanba HNGV iha komisaun médika mak sei fó pareser ba konsellu hodi foti desizaun.
Jornalista : Felicidade Ximenes
Editór : Zezito Silva
Kuandu ema tolok at no amesa mediku iha media soasial Fongtil Tiba Dukur…
Kuandu ema amesa no tolok Mediku sra iha Media Sosial FB…FONGTIL lian Laiha