BAUCAU, 13 janeiru 2023 (TATOLI) – Komandu Polísia Nasionál Timor-Leste munisípiu Baucau sesta ne’e, promove diviza ba membru hamutuk na’in-17 hosi nível ajente ba ajente prinsipál.
Komandante PNTL Baucau, Superintendente António de Sá, esplika, ho promosaun refere hanesan hakat pasu ida ba oin iha PNTL Baucau tuir estatutu pesoál PNTL artigu 93 kona-ba modalidade ba promosaun ne’ebé loloos hala’o ona iha 2022, maibé membru hirak-ne’e kategoriza iha modalidade atividade tanba serbí durante tinan neen ona.
“Tuir loloos ita promove iha tinan 2022 maibé razaun tékniku hanesan preparasaun diviza no hasoru loron boot natál no tinan foun,” nia hateten iha Baucau.
Membru na’in-17 komposta hosi mane na’in-16 no feto na’in-ida ne’ebé iha PNTL nafatin tane igualdade jéneru, la haree ba sexu mane ka feto nune’e membru hotu iha direitu hetan promosaun tuir sira-nia dedikasaun.
“Sira-ne’e hotu laiha kazu ruma hanesan disiplinár no kriminál,” António de Sá argumenta.
Superintendente António de Sá apela ba membru na’in-17 ne’e no komandante eskuadra neen inklui seksaun hotu atu kontinua hatudu komportamentu, dedikasaun no disiplina ne’ebé importante ba institusaun.
Membru hotu tenke hala’o kna’ar bazea ba misaun tuir Konstitusaun Repúblika Demkorátika Timor-Leste, artigu 147, lei orgánika artugu 2 kona-ba natureza PNTL katak, tenke defende liberdade demokrátiku, garante sidadaun nia seguransa interna no la inklina iha organizasaun poítiku ruma.
Ajente prinsipál Elizabet Belo Ribeiro, ne’ebé hetan promosaun diviza, sente kontente no urgullu ho promosaun diviza ne’ebé hetan no ba oin sei kontinua serbí nasaun liuhosi institusaun PNTL.
Jornalista Agência Tatoli tenta konfirma kona-ba identidade hosi membru na’in-17 ne’ebé hetan promosaun ne’e, maibé komandu PNTL Baucau la autoriza.
Jornalista : Natalino Belo
Editór : Evaristo Soares Martins
