VIQUEQUE, 13 janeiru 2023 (TATOLI)—Servisu Ministériu Agrikultura no Peska (MAP) Viqueque distribui ona fini hare variedade Nakroma tonelada 18 ba povu agrikultór sira iha postu lima.
“Ami distribui fini époka ne’e iha dezembru 2022, ho kuantidade tonelada 18 ba povu agrikultór sira kuda iha sira-nia natar no agora mós ami kontinua halo distribuisaun maibé seidauk hotu tanba kondisaun dalan,” Diretór Servisu MAP Viqueque, Fernando Joaquim, informa ba Agência Tatoli, iha ninia knaar fatin, sesta ne’e.
Nune’e, ekipa responsável distribui fini ba postu administrativu Ossu, Uatulari, Uatucarbau, Viqueque Vila no Lakluta, hodi fahe fali ba agrikultór iha suku sira.
“Aleinde ne’e, ami mós distribui batar sele kilograma 12.716 ba postu sira hodi bele kuda. Iha distribuisaun ne’e, ami-nia problema maka transporte limitadu no agora tempu udan,” nia akresenta.
Notísia relevante: MAP distribui fini hare tonelada 144 ba agrikultór kada tinan
Diretór dehan, kondisaun irrigasaun ladi’ak, difikulta agrikultór sira ne’ebé halo natar tanba sempre mosu sedimentasaun iha irrigasaun.
Iha munisípiu Viqueque iha irrigasaun rua hanesan Baidubu no Bebui Uatulari, ne’ebé sempre iha sedimentasaun, nune’e Servisu MAP destaka hela eskavadór ida hodi halo normalizasaun.
“Ami sempre hasoru problema irrigasaun tanba sempre mosu sedimentasaun. Iha Viqueque irigasaun boot no kiik iha 80 resin. Ami sempre hato’o proposta ba nasionál kona-ba problema irrigasaun kada tinan, maibé sira la responde tanba iha limitasaun orsamentu. Ami espera katak iha tinan ida-ne’e orsamentu ba manutensaun irrigasaun ne’e iha,” nia tenik.
Jornalista : Vitorino Lopes da Costa
Editora : Julia Chatarina
