RENETIL halo doasaun ran apoia pasiente ne’ebé presiza
DILI, 13 janeiru 2023 (TATOLI) – Rezisténsia Nasionál Estudante Timor-Leste (RENETIL), halo doasaun ran ba departamentu Banku Sangue Hospitál Nasionál Guido Valadares (HNGV) atu apoia ba pasiente sira ne’ebé mak presiza ran.
“Atividade doasaun ran ne’e, RENETIL halo hodi hatan ba ran ne´ebé menus iha Banku Sangue, HNGV, tanba pasiente sira barak mak presiza ran”, Segundo Vise Sekretáriu Jerál RENETIL, Glenda Ina Mori Carvalho, hateten ba jornalista sira iha edifísiu RENETIL, Palapasu, ohin.
Tuir nia pasiente ne’ebé mak tama iha HNGV, família barak mak preokupa tebes ba ran, entaun ho ida ne’e mak RENETIL foti insisiativa halo asaun kariedade iha tinan ne’e hodi fó solidaridade ba maluk sira ne’eb’e mak presiza ran.
“Ami mak organiza atividade ne’e maibé apoiu ran mós hosi estudante no membru balun husi asosisasaun rasik no mós membru husi RENETIL nian”, Glenda Ina Mori Carvalho informa.
Totál ema ne’ebé kontribui ran hamutuk 25 maibé ikus mai ema barak mak hakat ba no totál ema sae ba 50-resin.
Iha fatin hanesan, Koordenadór Servisu Transfuzaun ran iha banku sangue, Tomas Adelino, agradese ba RENETIL tanba apoiu ran ne´e asaun ida ajuda pasiente sira ne’ebé mak presiza ran iha HNGV.
“Ami agora daudaun ran menus los tanba loron ferias ema la iha voluntáriu atu halo doasaun ran, entaun daudaun ne’e RENETIL nia apoiu ajuda tebes”, Tomas Adelino agradese.
Nia afirma família sira mak apoiu ran maibé ba voluntáriu mak menus tebes liuliu tipu ran ne´ebé menus mak ran AB, O.
Jornalista :Felicidade Ximenes
Editór : Zezito Silva
