BOBONARO, 16 janeiru 2023 (TATOLI)-Diretór Servisu Edukasaun Munisipál Bobonaro, Crispim Lopes Moniz, hateten eskola hamutuk 12 iha munisípiu Bobonaro ne’ebé tama iha projetu konstrusaun no reabilitasaun infraestrutura rskolár (PKRIE) ho karáter komunitária tinan 2021 nian preparadu ona atu halo inaugurasaun iha tempu badak.
Diretór Crispim haktuir, munisípiu Bobonaro hetan projetu 21. Hosi númeru ne’e 12 mak finaliza ona no balun seidauk konklui tanba sei iha andamentu konstrusaun maibé maioria atinje 95%.
Notísia relevante: Projetu konstrusaun no reabilitasaun infraestrutura eskolár iha Bobonaro atinje 26%
“Konforme informasaun atuál sira-ne’ebé ha’u hetan hosi tékniku sira, konfirma ba ha’u katak iha eskola 12 maka sei halo inaugurasaun iha tempu badak,” nia informa ba jornalista sira, iha kna’ar fatin, bairru Maravilha, suku Odomau, segunda ne’e.
Diretór ne’e aubliña, inaugurasaun jerál nível nasionál sei ofisializa iha munisípiu Baucau no espesifiakmente sei hala’o mós iha munisípiu hotu-hotu.
Enkuantu, Ministériu Edukasaun, Juventude no Desportu (MEJD) prevee $2,409.512,03 iha tinan ne’e, sei konstrui no reabilita eskola hamutuk 21 ho sala aula 76 iha munisípiu Bobonaro, ne’ebé tama iha projetu komunitária.
Entretantu, eskola 21 iha Bobonaro ne’ebé tama projetu komunitária kompostu hosi ensinu pre-eskolár tolu, ensinu báziku 17 no ensinu sekundáriu jerál ida mak hanesan EPE Atu-Aben, EPE Rita-bou, EPE Holsa, EBC Gumer, EBC Hauba, EBF Dilai.
Nune’e mós EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou, EBF Rairobo, ESJ Númeru I Maliana no EBF 12 Abríl Março.
Notísia relevante: MEJD relata ba PM progresu konstrusaun eskola 92 atu halo inaugurasaun
Jornalista: Sérgio da Cruz
Editór: Evaristo Soares Martins
