DILI, 17 janeiru 2023 (TATOLI) – Ministériu Saúde (MS) halo hela negosiasaun ho Governu Koreia liuhosi Ajénsia Kooperasaun Internasionál Korea (KOIKA) atu harii Ospitál Munisipál Dili iha tinan ne’e.
”Ami durante ne’e halo hela negosiasaun ho KOIKA atu harii Ospitál Munsipál Dili tanba ne’e iha ona prosesu nia-laran”, Diretór Jerál Servisu Koorporativu iha MS, Marcelo Amaral, informa ba TATOLI iha HNGV.
Nia deklara ekipa husi KOIKA halo ona enkontru ho MS atu trata sasan sira ne’e ba oin tanba prosedimentu hotu tuir aprovizionamentu husi KOIKA mak diretamente hala´o prosesu ne’e tomak.
”Fatin ne’ebé atu harii mak iha eis-merkadu Comoro maibé iha terenu ami sei haree hela atu rezolve ida ne’e”, Sublina nia.
Tuir planu MS atu harii iha tinan ida ne’e, espera katak prosesu la´o lalais atu bele termina negosiasaun no bele hahú ona konstrusaun.
”Tanba ne’e mak orsamentu rasik sei mai husi Governu Koreia no planu diskusaun daudaun ne’ lao hela”, konklui nia.
Jornalista : Felicidade Ximenes
Editór : Zezito Silva
