DILI, 17 janeiru 2023 ( TATOLI) – Diretór Jerál Serbisu Koorporativu, Ministériu Saúde, Marcelo Amaral, dehan profisionál saúde hamutuk 29 sei aranka ba Kuba iha 28 janeiru ho objetivu atu tuir kursu espesializadu.
”Sira nia prosesu preparativu durante ne’e hotu ona, entaun iha loron 28 fulan janeiru agora aranka ona ba Kuba”, Marcelo Amaral, informa ba TATOLI, ohin.
Marcelo salienta profisionál saúde sira ne’ebé mak sei ba tuir kursu iha área sira hanesan, medisina intesivista emerjénsia na’in tolu, onkolojia na’in tolu, patolojia klíniku ida, patolojia anatomia ida, radiolojia rua, medisina fízika no reabilitasaun ida, psiquiatria ida, kardiolojia na’in haat, otorrinolaringolojia na’in ida, pediatria na’in ualu, enfermeiru intensiva no emerjénsia tolu, no enfermeiru neonatal na’in ida.
”Banhira sira atu ba Kuba, antes ne’e halo ona selesaun ka teste hotu ona hanesan administrativu nian, no mós lingua espanhol tanba ba eskola sei ko’alia lian ida ne’e, entaun haree ba buat hirak ne’e hotu mak sira atu ba ona iha fulan ne’e”, Marcelo dehan.
Nia rekorda katak MS prevee orsamentu millaun $1-resin hodi haruka médiku sira ba estuda iha Kuba durante tinan tolu nia laran.
Tuir dadus rekursu umanu husi MS katak espesialista timoroan hamutuk 74 ne’ebé halo atendimentu iha Hospitál Nasionál Guido Valadares (HNGV) no Hospitál Referál sira iha munisípiu. sira ne´e espesialista anestesia na’in haat, dentista rua, dermatolojia na’in tolu, endrokolojia na’in rua, espesialista tilun, kakorok no ibun na’in rua.
Enkuantu espesialista ba jenekolojia tolu, intermista lima, intensiva emerjénsia lima, kardiolojia na’in hitu, nefrolojia na’in neen, objym neen.
Oftamolojista lima, onkolojia rua, ortopedista rua, patolojia anatomi ida, patolojia klínika ida, pediatria haat, psikataria rua, polmonolojista rua, radiolojista rua no sirurjiaun neen.
Jornalista : Felicidade Ximenes
Editór : Zezito Silva
