DILI, 17 janeiru 2023 (TATOLI) – Vise-Ministru Saúde, Bonifacio Maucoli dos Reis, dehan sentru kardiaku iha Lahane sei halo operasaun dahuluk iha fulan maiu.
“Ami asina ona nota entedimentu ho Diretór IHEAL medical center Malazia iha semana kotuk liuba katak ekipamentu sentru kardiaku nian iha Lahane husi médiku espesialista Malazia mak sei halo instalasaun no tuir planu ita inisia iha maiu, bainhira halo hotu instalasaun ekipamentu hirak ne’e, ita sei halo operasaun dahuluk nian”, Vise Ministru Saúde Bonifacio Maucoli dos Reis, hateten ba TATOLI iha kna’ar fatin MS, Caicoli, ohin.
Nia informa fasilidade ne’ebé médiku espesialista sira lori husi Malazia mai, iha tempu badak no sei halo instalasaun ba Intensive Cardiology Care Unit (ICCU), no mós Intensive Care Unit (ICU) nian, inklui instalasaun ba fasilidade kardiu nian.
“Ita mós sei haruka profisionál saúde na’in ualu sei ba tuir formasaun kardiaku nian iha nasaun Malazia, hodi kapasita liután iha área kardiaku nian, maibé atu halo operasaun ba fuan ita atu hahú espesilaista IHEAL sei mai apoiu sirurjiaun kardiolojia no mós katerizasaun nian iha ita nia rain”, esplika nia.
Tuir pedidu husi IHEAL medical center katak médiku na’in-ualu ne’e seidauk to´o, maibé MS sei haree tan destakamentu husi HNGV hodi aumenta hodi ba tuir formasaun ida ne’e.
“Orsamentu Jerál Estadu 2023 hamutuk milaun rua-resin mak sei halo ba instalasaun ekipamentu nian, maibé bainhira instalasaun hotu, kustu bazea ba operasaun tuir memorandu ne’ebé mak MS ho IHEAL asina ona”, akresenta nia.
Tanba ne’e médiku espesialista sira husi IHEAL Malazia sei akompaña durante tinan lima to´o 10 iha ne’e, atu fó formasaun mós ba médiku sira área kardiolojia nian.
“Bainhira instalasaun fasilidade los ona, ita diskute atu bele haruka tan médiku espesialista sira ba hasai sub-espesialista iha rai-liur, bainhira ita bele ona fó formasaun ba pasiente sira iha rai-laran, ho nun’e ita mós bele hapara ona kontratu ho IHEAL”, relata nia.
Tuir nia banhira MS inisia sentru kardiaku ne’e iha Timor-Leste signifika halo ona redusaun transferénsia ba rai-liur. Entaun ida ne’e poupa ona orsamentu tanba dalabarak haruka pasiente ba liur kustu bo´ot liu kompara ho tratamentu iha rai-laran.
“Kustu iha rai-liur, ita konta kustu taransporte família pasiente, kustu moris, sira nia tratamentu iha ne’eba, depois hotu tiha ita selu kustu tratamentu ba ospitál sira ne’ebé mak nia kustu bo´ot liu kompara ho instala rasik iha ita nia rain”, konklui nia.
Jornalista : Felicidade Ximenes
Editór : Zezito Silva
