Ekipa vizilánsia mantein iha portu entrada sira halo prevensaun ba Covid-19
DILI, 18 janeiru 2023 (TATOLI) – Vise-Ministru Saúde, Bonifacio Maucoli dos Reis, informa Ministériu Saúde (MS) mantein nafatin iha portu entrada hodi halo prevensaun ba kazu Covid-19.
“Ita nafatin preparadu liuliu vijilánsia epidemolojia, haree nafatin iha parte portu entrada sira liuliu medida preventiva sira oinsá bele halo mitigasaun ba kazu Covid-19, tanba ita hatene nasaun Xina kazu aumenta ona”, Vise Ministru Saúde Bonifacio Maucoli dos Reis, hateten ba Tatoli iha nia kna’ar fatin, Caicoli.
Nia dehan daudaun ne’e kazu Covid-19 iha maibé ida ka rua, mai ho asintomátiku no la iha ospitalidade.
“Ita mantein halo prevensaun iha kontestu infraestrutura, ida ne´e kuaze ita prontu ona tanba ita nia fatin izolamentu iha munisípiu no nasionál daudaun ne’e preparadu hela inklui ekipamentu”, esplika nia.
Tanba ne’e, nia husu ba populasaun sira mantein medida protokolár, uza anafatin maskara, fase liman, kontinua ba simu vasina tanba vasina ne’e mak atu haforsa imunidade ema nian hodi kontra moras Covid-19.
“Vasina dahuluk no daruak ita atinje ona nia alvu, agora ba sira ne’ebé mak seidauk simu datoluk tenke kontinua simu iha fasilidade saúde sir tanba vasina datoluk ne’e nia kobertura sei kiik foin atinje 35%”, saliente nia.
“Kona ba rekursu umanus ita sufisiente hodi responde karik kazu ne´e mosu tan iha ita nia-rain”, Bonifacio akresenta.
Populasaun iha teritóriu nasionál ne’ebé mak to´o ohin loron 18 janeiru 2023 simu ona vasina hamutuk 1,904,894, no totál kazu ba Covid-19 to´o ohin loron hamutuk 23,407, totál kazu rekupera 23,257, totál teste 284,805 no totál óbitu hamutuk138.
Jornalista : Felicidade Ximenes
Editór : Zezito Silva
