DILI, 19 janeiru 2023 (TATOLI)— Konsellu Administrasaun Petróleu Timor Gas no Petróleu Empreza Públika (Timor-GAP, E.P) ho Mahakaya Geo Survey (MGS) Indonézia iha 13 janeiru ne’e, asina kontratu hodi halo servisu projetu peskiza ho naran ‘Metinaro Site Survey Campaingn’.
Liuhosi pájina ofisiál, Timor GAP, ne’ebé Agência Tatoli asesu, serimónia asinatura ne’e, marka prezensa, hosi Diretór Jestaun Unidade Negosiu Downstream Timor GAP, Francelino Boavida, no ninia delegasaun sira akompaña mos Diretor Prezidente MGS liuhosi sorumutuk offline ida iha sede Kuartel Jerál MGS nian ne’ebé lokaliza iha Jakarta.
“Projetu ‘Metinaro Site Survey Campaingn’ ne’e, bazeai ba atividade lima mak hanesan Topographic and Aerial Mapping, Onshore Geotechnical, Nearshore Geophysical, Offshore Geotechnical, no Metocean, ne’ebé sei implementa iha postu adminitrativu Metinaro munisípiu Dili,” Francelino Boavida hateten.
Francelino Boavida hateten, ho asina akordu ne’ebé sira halo hein katak MGS sei hatudu dedikasaun boot atu implementa planu ne’e ho susesu.
“Ita hili MGS nu’udar kontratór ba peskiza ne’e, tanba ho esperiénsia naruk no rejistu reputavel iha indústria ne’e. Ida ne’e importante tebes atu marka inísiu ba jornada seguransa enerjetika Timor-Leste nian,” Francelino hateten.
Iha fatin hanesan, Diretór Ezekutivu MGS, Henky Suharto, hateten, ho asina akordu ne’ebé iha MGS sente onra tebes atu lori konfiansa no oportunidade ne’ebé fó ona ba projetu refere.
“Ami sei hatudu kompromisu boot hodi fornese servisu ho maneira seguru no kualidade prestasaun ne’ebé aas. Ha’u fiar katak MGS bele partisipa iha projetu ida-ne’e hodi apoia vizaun boot sira Governu Timor-Leste nian, liuliu ba kresimentu ekonómiku Timor-Leste nian,” Henky hateten.
Diretór Ezekutivu MGS, Henky Suharto, hateten ba oin implentasaun projetu ‘Metinaro Site Survey Campaingn’ ne’e bele iha komunikasaun ne’ebé di’ak entre parte rua, no servisu ne’e sei la’o ho di’ak,
Jornalista : Arminda Fonseca
Editora : Armandina Moniz
