BOBONARO, 20 janeiru 2023 (TATOLI) – Ministériu Solidariedade Sosiál no Inkluzaun (MSSI) sei adia loron atu transpora sidadaun moras mentál orijen hosi suku Ritabou, postu administrativu Maliana ne’ebé koñesida ho naran ‘Nando Pinki’ ba tratamentu iha fatin rebalitasaun Laklubar, munsípiu Manututu ho razaun governu sei halo hela reablitasaun ba fatin refere.
Diretór CSSI Munisípiu Bobonaro, Francisco Tilman, tuir loloos governu halo ona transportasaun iha fulan-novembru tinan kotuk, tanba parte família koopera ona ho governu.
Notísia relevante: MSSI sei lori sidadaun moras mentál ida hosi Maliana ba tratamentu iha Laklubar
“Ita la konsege lori ba tanba de’it iha fatin atendimentu Laklubar nia sei iha reablitasaun loke tán sala balu, tanba ne’e mak adianta fali hodi hein prosesu ne’e remata mak nasionál sei mai foti,” nia informa ba jornalista sira iha kna’ar-fatin, Maliana, kinta ne’e.
Nia haktuir, durante ne’e observa katak presiza duni halo tratamentu ba sidadaun moras mentál na’in-tolu ho sensu mane na’in-rua no feto ida ne’ebé movimenta ba-mai iha kapitál Maliana ho kondisaun psikolojikamenge grave.
Maibé durante halo aprosimasaun parte família rezultadu hatudu katak na’in-rua de’it mak konfirmadu hanesan ‘Nandu Pinki’ no ‘Mali-Holsa’. Enkuantu Feto ida ho naran ‘Rita’ seidauk iha solusaun tanba família ladún koopera di’ak ho razaun laiha ema atu akompaña durante prosesu transportasaun hosi Maliana ba Laklubar.
“Ita ezije nafatin katak família koopera, ami prontu lori ba, entre sira-ne’e ita bele transporta hotu, tanba ita iha transporte bele lori mós família ba sira bele hela to’o semana ida iha-ne’ebá, ne’e buat hotu-hotu Laklubar mak sei atende,” nia katak.
Diretór Francisco subliña razaun lori sidadaun hirak-ne’e ba thalo ratamentu iha Laklubar tanba hamonu dignidade família inklui fó impaktu ba edukasaun formál labarik sira-nian.
“Sira-nia kapasidade koneksaun ho komunidade ne’ menus loos ona, tanba sira laiha sentimentu ba utilizadaun roupa, depois la’o iha dalan públiku mós la haree motorizada ho karreta, tuir de’it sira-nia hakarak. Ida-ne’e mak ita haree sira-nia mentál ne’e grave tebes, presiza ita lori ba fatin hakmatek,” Francisco dehan.
Notísia Relevante:Pasiente moras mentál na’in 10 halo tratamentu saúde iha Laclubar
Jornalista : Sérgio da Cruz
Editór : Evaristo Soares Martins
