iklan

BAUCAU, HEADLINE, MUNISÍPIU, SAÚDE

Saúde Baucau rejista dengue 17 iha inísiu janeiru

Saúde Baucau rejista dengue 17 iha inísiu janeiru

Diretór Servisu Munisipál Saúde Baucau, Domingos Reinaldo da Costa Guterres. Imajen Tatoli/Natalino Belo.

BAUCAU, 24 janeiru 2023 (TATOLI) – Servisu Munisipál Saúde Baucau rejista kazu moras dengue hamutuk ema na’in-17 iha inisiu fulan-janeiru tinan 2023.

Diretór Servisu Munisipál Saúde Baucau, Domingos Reinaldo da Costa Guterres, esplika, hosi númeru refere maoria afeta ba labarik idade 0 to’o 5, komposta hosi mane na’in-10 no feto nain-hitu.

“Ita hotu tenke hamutuk atu fahe informasaun liuhosi meiu oinoin atu halo prevensaun, fila ba konsiénsia atu oinsá labele hetan moras,” Diretór Servisu Munisipál Saúde hateten iha Vila Antiga, tersa ne’e.

Pasiente sira maihosi sentru saúde haat iha munisípiu Baucau komposta hosi Venilale na’in-tolu, Bucoli na’in-ida, Baguia na’in-ida, Baucau vila no HoREX hamutuk na’in-12.

Servisu Saúde Baucau iha inisiu tinan 2023 kontinua esforsu halo prevensaun liuhosi maneira kombate dengue hanesan fahe abate, rega ai-moruk no sosializa ba komunidade liuhosi sentru saúde inklui postu saúde no klínika sira.

Domigos Guterres esplika, abate iha limitasaun tempu kada fulan-tolu nune’e seidauk efetivu atu kombate susuk iha komunidade tanba ne’e presiza kontribusaun hosi entidade hotu, liuliu autoridade lokál atu hasa’e konsiénsia komunidade hodi hamoos ambiente iha tempu udan.

“Estoke iha, ita rasik presiza kontrola ho efetivamente bainhira abate nia forsa menus ona, komunidade bele husu atu utilza fali,” Domingos akresenta.

Servisu saúde konsidera dengue nu’udar moras perigozu nune’e bainhira labarik sira iha síntoma hanesan isin-manas tenke transporta lalais ba sentru saúde atu halo tratamentu.

Jornalista   : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!