Bolseiru nain-29 despede no sei arranka ba Cuba iha 28 janeiru
DILI, 26 janeiru 2023 (TATOLI) – Bolseiru ba espesialidade medisina no enfermajen na’in-29 agradese ba Ministériu Saúde (MS) liuhosi despedida ne’ebé efetua iha Caicoli. Bolseiru hirak ne’e sei arranka ba Cuba iha 28 janeiru.
Reprezentante bolseiru, Romel da Costa Braz, agradese ba Governu liuliu Ministériu Saúde ne’ebé fó oportunidade atu ba hasai kursu espesializadu iha nasaun Cuba, hodi mai implementa fila fali iha Timor-Leste.
“Ha’u hanesan bolseiru, lori kolega sira nia-naran hakarak hato’o agradesimentu ba VIII Governu Konstituisionál, espesiál ba Ministériu Saúde katak ami komprometidu bainhira ami ba Kuba, ho objetivu ida atu hetan susesu no hakarak atu kontribui ba ita nia rai”, representante bolseiru, Romel da Costa Braz, dehan iha serimónia despedida bolseiru medisina enfermajen no espesialista ne’ebé atu kontinua estudu iha Cuba, iha salaun MS Cailoli, ohin.
Iha fatin hanesan, Ministra Saúde Odete Maria Freitas Belo, agradese ba médika kubana sira tanba fó oportunidade ba médiku espesialista timoroan na’in-29 ne’ebé atu kontinua estudu iha Cuba ho didi’ak to’o fila mai atu servi ba ema moras sira.
“Hahú iha Governu dahuluk kedas ita servisu hamutuk ho Cuba, ikusmai ita iha rihun-ida-resin médiku jerál, entaun ita amigu ho nasaun Cuba ne’ebé prodús, ajuda ita nia médiku sira, depois sira ajuda ita estebelese Fakuldade Medisina iha UNTL, entaun ida ne’e bele ajuda ita minimiza rekursu sira ba iha Cuba, maibé bele hala’o formasaun iha rai-laran. Ho nune’e ita iha oportunidade nafatin hodi haruka ita nia profisionál saúde sira kontinua fila fali estudu espesializadu nian to’o fila mai atu servi ita-nia rain ho di’ak”, Odete Maria Belo esplika.
Profisionál saúde na’in-29, ne’ebé mak tuir kursu, iha área sira hanesan, medisina intensivista emerjénsia na’in tolu, onkolojia tolu, patolojia klíniku ida, patolojia anatomia ida, radiolojia rua, medisina fízika no reabilitasaun ida, psiquiatria ida, kardiolojia na’in haat, otorrinolaringolojia ida, pediatria na’in ualu, enfermeiru intensiva no emerjénsia na’in tolu no enfermeiru neonatal na’in ida.
Jornalista : Felicidade Ximenes
Editór : Zezito Silva
