DILI, 26 janeiru 2023 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jerál Falur Rate Laek, hateten membru F-FDTL foun sira sei ramata sira-nia treinamentu iha semana ne’e.
“Ko’alia situasaun jerál partikulár ne’ebé rekrumentu agora iha ona faze ikus, treinamentu sei termina iha semana ne’e. Sira-ne’e mai prepara de’it asaun serimónia juramentu iha Bandeira,” nia hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Membru foun F-FDTL durante semana hira nia laran tuir treinamentu iha área kampu munisípiu Manatuto ho sakrifísiu boot.
“Durante semana hira nia laran sira iha ai-laran la han, la haris, la hemu, sakrifísiu makaas iha ne’ebá. Ha’u orsida lorokraik sei ba vizita sira iha kampu treinamentu iha área Manatuto nian,” nia dehan.
Antes ne’e, iha loron 05 setembru 2022, komisaun rekrutamentu konjunta kompostu hosi F-FDTL no Ministériu Defeza (MD) ofisialmente anúnsia lista naran membru foun na’in-600 mak admitidu iha vaga F-FDTL tinan 2022.
Nune’e, kadete foun sira-ne’e aprezenta an ba Komandu iha loron 19 setembru 2022, hafoin reintegra ba Metinaro hodi bele hahú tuir treinamentu.
Notísia Relevante: Kadete foun F-FDTL 600 hahú treinu, na’in-rua rejigna-aan
Jornalista : Nelson de Sousa
Editór : Cancio Ximenes
