OÉ-CUSSE, 27 janeiru 2023 (TATOLI) –Formandu na’in-hitu hosi aeroportu Rota do Sândalo iha Rejiaun Administrativa Espesiál Oé-Cusse Ambeno (RAEOA), sesta ne’e kompleta ona sira-nia formasaun iha área operasaun aeroportu nian durante semana rua iha Sentru Edukasaun no Formasaun ba Voo Curug iha Tangeran, Jakarta, Repúblika Indonésia.
Formandu na’in-hitu ne’e maka hanesan, Nicolau Eeli, Ronaldo Domingos Minheir Hornai do Rosario. Abílio de Jesus Elo, Heriberto Moniz Leto Bere, Clarissa Hortencia Cristabela Feliciana Talia Goncalves Ximenes, Lúcia Catarina Bana no Benedita Titis Cofitalan.
“Ohin ami remata formasaun iha área operasaun aeroportu nian hamutuk na’in-hitu, ohin ami realiza ona seremónia despedida ho formadór sira, ne’ebé aban sábadu (28/01) sei dezloka ona hosi Jakarta ba Kupaun no Domingu (29/01) sei to’o Oé-Cusse,” Formandu Benedita Titis Cofitalan, ba Agencia Tatoli liuhosi watsaap hosi Jakarta.
Nune’e nia reprezenta formandu sira, hakarak agradese ba formadór sira no mós Autoridade RAEOA, tanba fasilita ona formasaun hanesan funsionáriu iha aeroportu internasionál Rota do Sândalo.
“Iha oportunidade ne’e ami agradese tebes, tanba kooperasaun entre Autoridade RAEOA hamutuk ho BP3 konsege ajuda ona ami, nune’e bele hasa’e tán ami-nia koñesimentu liga ba operasaun nian,” formandu ne’e orgullu.
Entretantu antes ne’e, Xefe salaun BP3 Curug Tangeran Jakarta, Ahmad Hapipi, informa, formasaun realiza tanba servisu hamutuk liuhosi kooperasaun entre BP3 ho RAEOA Timor-Leste, ho objetivu hodi fahe matenek no esperiésia kona-bá operasaun aeroportu, seguransa no bombeiru nian, ne’ebé importante ba funsionáriu sira iha aeroportu.
Lala’ok formasaun ne’e realiza ho kritéria bazea ba kurrikulu prevista iha Ministériu Transporte no Komunikasaun Repúblika Indonésia nian, hanesan;
Formasaun ba área operasaun aeroportu implementa ho oras 90 ba matéria no oras 30 ba prátika, formasaun ba área seguransa aeroportu nian oras 212 komposta hosi oras 112 materia no oras 100 prátika
Formasaun inisia ba área seguransa juniór iha oras 136, komposta hosi, oras 60 ba matéria no oras 76 prátika semo nian, formasaun aviasaun seguransa supervisor sira iha oras 120, komposta hosi oras 54 ba teória no oras 66 ba prátika.
Purtantu, atu garante kualidade iha formasaun ne’e, BP3 prepara formadór sira hosi instrutura profisionáll sira mai hosi BP3 Curug, PPI Curug, diretór Nasionál Voo Repúblika Indonézia, no mós Autoridade aeroportu internasionál Soekarno Hatta.
Notísia relevante: Formasaun iha Jakarta, nu’udar preparasaun ba futuru sertifikasaun aeroportu Rota do Sândalo
Jornalista: Abílio Elo Nini
Editór: Evaristo Soares Martins
