Timor Gap kontratu PT. Tripatra halo estudu viabiliade ba projetu TIP
DILI, 27 janeiru 2023 (TATOLI)— Konsellu Administrasaun Petróleu Timor Gas no Petróleu, Empreza Públika (Timor Gap, E.P), ho PT. Tripatra Enjinering asina kontratu ba estudu viabiliade no enjineria front ba projetu Terminal Importasaun Petroleu (TIP) Metinaro Dili.
Bazeai ba nota komunikadu ne’ebé Agência Tatoli asesu sesta ne’e, liuhosi pájina ofisiál Timor Gap, hateten, asinatura kontratu refere hala’o iha Jakarta loron 18 janeiru ne’e, haktuir prosesu tenderizasaun internasional ida, ne’ebé kumpri tomak prosedimentu tenderizasaun kontratu Timor-Leste no internu hosi Timor GAP,E.P.
Asinatura refere, hala’o hosi Diretor Jestaun Unidade Negosiu Downstream TIMOR GAP E.P, Francelino Boavida, no Raymond Naidi Rasfuldi, Prezidente Diretor no CEO hosi PT Tripatra Enjinering (TRIPATRA) iha sorumutuk in-personal ida iha Gabinete Kuartel- Jeral TRIPATRA iha Jakarta.
Projetu refere, bazeia ba dezenvolvimentu Terminal Importasaun Petroleu (PIT) hodi fornese stok estratéjiku hosi kombustivel petrolíferu ba seguransa enerjétika Timor-Leste nian bainhira iha susar ruma ba supply chain.
Fasilidade PIT nian iha ámbitu servisu jerál mak fasilidade marítima ida atu fornese ba tanke produtu petróleu ne’ebé liga ho tanke rai maran ba armazenamentu gazoel, petróleu, kombustivél aviasaun, LPG no armazen armazenamentu lubrikante.
Skopu servisu hosi kontratu PT. Tripatra Enjinering mak atu fornese estudu viabilidade ida-ne’ebé atualizadu, tuir ho Front-End Engineering (FEED), nune’e ba projetu estudu viabilidade ne’e rasik períodu fulan sanulu.
Jornalista : Arminda Fonseca
Editora : Armandina Moniz
