DILI,30 janeiru 2023 (TATOLI) – Ministériu Saúde liuhosi Diresaun Nasionál Farmasia no Medikamentu (DNFM) rekolle ona ai-moruk item neen ho botir 7.686 ne’ebé kontaminadu iha territóriu nasionál.
Pontu Fokál ba Substandard no Falsified Medicine iha Ministériu Saúde Suzana Henriques, rekorda katak ekipa DNFM halo inspensaun iha tinan 2022 no rekolle ai-moruk item neen ne’ebé kontaminadu husi Xarope Unibeby Cough hamutuk botir 6,792, termorex syrup botir 307, Antasida Doen Syrup botir 168, Paracetamol Srawberry syrup 413, Ibuprofen syrup la iha no paracetamol rasa jeruk botir neen iha teritóriu nasionál.
“Durante ami rekolle ai-moruk iha merkadoria sira iha territóriu nasionál, étapa dahuluk ne’ebé mak ami halo iha tinan 2022 iha munisípiu Dili, ami rekolle ba item rua mak hanesan xarope Unibeby Cough no termorex syrup, depois tuir ami rekolle tan item haat hanesan, Antasida Doen Syrup, Paracetamol Srawberry syrup, Ibuprofen syrup no paracetamol rasa jeruk, entaun aimoruk sira ne’e mai husi kompaña tolu hanesan PT farmasiutika universál, PT Afy farma, no mós PT yourindo ne’ebé hatama husi importadór lokál sira mai Timor-Leste”, Pontu Fokal ba Substandard no Falsified Medicine iha Ministériu Saúde, Suzana Henriques, dehan iha nia kna’ar fatin Caicoli, ohin.
Nia esplika, ho momentu ne’ebá ekipa sira tun ba munisípiu hodi rekolle iha farmasia privadu sira hanesan Aileu la iha, Ainaro rekolle Xarope Unibeby Cough botir rua, Baucau rekolle Unibeby Cough hamutuk botir 938, Bobonaro Unibeby Cough iha botir hitu, Antasida Doen Syrup botir sia, Covalima unibeby botir 13, Antasida Doen Syrup botir hitu, Paracetamol Srawberry syrup 191.
Nune’e mós, iha Munisípiu Ermera, MS rekolle Paracetamol Srawberry syrup botir hitu, Liquiça Unibeby Cough botir 17, Paracetamol Srawberry syrup botir 22, paracetamol rasa jeruk botir neen, Munisípiu Lautem Unibeby Cough botir 69, termorex botir lima.
Manatuto Unibeby Cough botir 26, termorex botir haat, Manufahi Unibeby Cough botir 347, Antasida Doen Syrup botir 152, Paracetamol Srawberry syrup 114,Viqueque Unibeby Cough botir 20, Raeoa Unibeby Cough botir 79, Paracetamol Srawberry syrup 15.
“Ai-moruk ibuprofen durante ne’e SAMES mak hatama mai, maibé seidauk distribui to’o fasilidade saúde sira foin iha armazen rejionál entaun ita bele foti fila fali”, nia salienta.
Ba item haat ekipa DNFM sei tuun iha semana oin atu rekolle fila fali hanesan Antasida Doen Syrup, Paracetamol Srawberry syrup, Ibuprofen syrup no paracetamol rasa jeruk iha munisípiu Dili.
“Ai-moruk sira ne’ebé mak ita rekolle iha merkadu territóriu nasionál ne’e balun tau armazen SAMES hodi asegura no balun tau iha DNFM nian depois hein etapa daruak nian iha Dili ne’e hotu mak halo destruisuan dala ida iha tempu badak”, nia informa.
Ai-moruk ne’ebé mak rekolle ne’e iha ai-moruk balun mai husi kompaña seluk ne’ebé sira durante halo akizasaun atu bele substituisaun hodi fó ba labarik sira.
“Depois ami alerta ba ai-moruk item neen ne’ebé pasiente sira sosa barak tebes iha fasilidade saúde privada sira maibé durante la iha populasaun ida mai keixa kona ba ai-moruk nia reasaun adversu ruma husi labarik sira ne’ebé mak konsumu,” nia haktuir.
Jornalista : Felicidade Ximenes
Editór : Zezito Silva
