Estudante 280 iha Oé-Cusse hahú teste orál ba bolsa hakbiit asesu UNTL-IPB
OÉ-CUSSE, 01 fevereiru 2023 (TATOLI) – Estudante hamutuk na’in-280 hosi Rejiaun Administrativa Espesiál Oé-Cusse Ambeno (RAEOA), kuarta ne’e hahú teste entrevista atu asesu bolsa hakbiit atu kontinua sira-nia estudu iha Univesidade Timor-Lorosa’e (UNTL) no Institutu Politékniku Betano (IPB).
“Ohin loron kuarta (01/02), Sekretária Rejionál ba Asuntu Edukasaun no Solidariedade Sosiál serbisu hamutuk ho Ministériu Ensinu Superiór Siénsia no Kultura (MESSK) liuhosi Diresaun Nasionál Ensinu Superiór Universitáriu no Tékniku (DNESUT) hahú hala’o teste entrevista ba estudante 280 durante loron tolu iha salaun edukasaun Oé-Cusse,” refere komunikadu imprensa ne’ebé Agência Tatoli asesu liuhosi Gabinete Prezidente Autoridade RAEOA, kuarta ne’e.
Nota imprensa ne’e hatutan, objetivu hosi teste ne’e, estudante sira bele asesu ba bolsa estadu hakbiit iha UNTL no IPB, bazea ba valór ikus ezame nasionál ka NIM 7,0 hosi estudante ho kategoria kbiit-laek, no veteranu oan rejistu no hili fakuldade no departamentu tuir idak-idak nia kapasidade.
“Prosesu entrevista ne’e hala’o durante loron tolu iha edifísiu edukasaun hahú loron 30 janeiru to’o 01 fevereiru 2023, DNESUT no akompaña direita hosi Diretór Rejionál Edukasaun Oé-Cusse Daniel Mauno, no rezultadu hosi teste ne’e sei públika iha fulan-fevereiru nia laran,” sita iha komunikadu imprensa ne’e.
Jornalista : Abílio Elo Nini
Editór : Evaristo Soares Martins
