BOBONARO, 01 fevereiru 2023 (TATOLI) – Hafoin akontese udan-boot dezde loron 31 janeiru ne’e to’o horkalan rezulta rai-halai halo estrada iha área Lekhi-Achi, aldeia Galusapulu, suku Lahomea besik atu kotu totál, nune’e kondisaun estrada atuál kalsu de’it ho ai-kabelak hodi ultrapasa.
Nune’e ohin, kuarta, tuku 08:00 komunidade sira hola inisiativa kalsu de’it ho ai-kabelak ida hodi fasilita movimentasaun transporte hosi diresaun kapitál Maliana ba postu administrativu Bobonaro no Lolotoe, munisípiu Bobonaro.
Abitante hosi aldeia Galusapulu, suku Lahomea, Domingos Gonçalves ,hateten estrada ne’e kotu loos ona, hela de’it espasu motorizada nian, nune’e provizóriu movimentasaun karreta kiik ka boot paradu totál.
Maibé nia hatutan, bainhira motorizada atu ultrapasa ba mai mós tenke husu komunidade sira-nia apoia, tanba rai-halai halo estrada fera no monu hotu ba kraik.
Notísia relevante: Deputada Maria Barreto husu Governu normaliza estrada Galusapulu
Enkuantu kona-ba karreta sira-ne’ebé tula sasán nesesidade bázika ba postu administrativu Bobonaro no Lolotoe mós tenke la’o ho estafeta.
“Sira husu ajuda fó netik ami $1 ka $2, ami lalin ba sorin. Sé sira la fó entaun hanesan agora daudaun sira na’in lalin, hanesan mós ohin alin ida mate hosi Maliana ne’e mai fila de’it, entaun ami ajuda leba ema mate ne’e ba fali sorin,” nia informa ba jornalista Tatoli, iha Galusapulu, kuarta ne’e.
Iha fatin hanesan, abitante suku Karabau, postu administrativu Bobonaro, Arlindo Soares, sente triste haree kondisaun estrada refere tanba sasán sira-ne’ebé sosa iha kapitál Maliana tenke selu ema lalin.
“Ami sente araska oituan tanba tula sasán todan trasnfere de’it hanesan ne’e, ita liu ba-mai la di’ak, ami enxe fali ema-nia mina karreta $100 hanesan. Ida-ne’e mak ami sente triste tanba estrada ne’e atu kleur ona, maibé to’o agora estadu la tau matan,” nia hatutan.
Relasiona ho problema ne’e, komunidade ezije Ministériu Obra Públika atu halo intervensaun lalais tanba bele fó impaktu ba atividade ekonomia.
“Ida-ne’e dalan publiku, hanesan ne’e ema movimentu ba-mai, haree ba agora sasán de’it mós lalin de’it. Sé governu la tau matan lalais rai sira-ne’e ba hotu kedas, tanba ne’e natureza mak halo, ne’ebé la aguenta ida, agora atu loke dalan foun mós araska,” nia katak.
Tuir observasaun Agência Tatoli iha terrenu nota katak, karreta privadu no públiku barak mak deside fila no balu tenke hein forma iha estrada sorin-sorin hodi hein karreta seluk mai tula sasán nesesidade bázika.
Enkuantu iha fatin ne’e mosu komunidade sira iha área Galusapulu fa’an sasán Kioske nia inklui ai-haan balu ba komunidade sira hosi suluk seluk ne’e utiliza transporte labele ultrapasa ba mai.
Notísia relevante: Autoridade Bobonaro la ‘toba dukur’ ba kondisaun estrada Galusapulu
Jornalista : Sérgio da Cruz
Editór : Evaristo Soares Martins
