DILI, 01 fevereiru 2023 (TATOLI) – Diretór Nasionál Saúde na Família iha Ministériu Saúde, Vitór Soares, dehan labarik tinan lima mai kraik na’in neen hetan reasaun adversu iha Munisípiu Dili, Baucau no Rejiaun Administrativa Espesiál Oe-Cusse Ambeno, hafoin simu vasina no imunizasaun integradu.
“Labarik sira ne’ebé mak hetan reasaun adversu ne’e hamutuk na’in neen, hirak ne’e hosi Munisípiu Baucau nain-rua, RAEOA rua no Dili rua”, Vitór Soares, dehan iha nia kna’ar fatin, ohin.
“Kona-ba reasaun adverse, antes vasina atu lao iha munisípiu hotu, ekipa promosaun saúde halo ona sensibilizasaun informasaun ba komunidade sira katak bainhira lori labarik ba vasina, haree kondisaun di’ak mak lori ba, se karik moras labele fó vasina uluk, tanba ba postu vasina médiku sira sei koko sira nia kondisaun, se kondisaun estável mak sira simu sira nia vasina”, afirma nia.
Nia esplika, labarik sira ne’ebé hetan reasaun adversu ne’e sira simu vasinasaun OPV, PCV, sarampu rubella, Vitamina A no Albendazole.
Iha 12 janeiru hahú vasinasaun ba labarik idade tinan lima mai kraik to’o iha 30 janeiru iha teritóriu nasionál, labarik ne’ebé simu ona vasina OPV hamutuk 96,893 ka 57,7%, PCV hamutuk 94,037 ka 57,8%, sarampu no rubella hamutuk 80,696 ka 55,0%, Vitamina A hamutuk 85,231 ka 55,9% no albendazole hamutuk 76,026 ka 55,0%.
“Husi rezultadu ne’e hatudu katak husi munisípiu 13 ita seidauk konsege atinje alvu ne’ebé mak determina liuhosi 95%, entaun molok to’o iha ne’eba asaun saida mak ami halo mak nafatin sensibiliza ba komunidade atu lori labarik ba simu sira nia vasina hodi hasa’e sia nia imunidade hodi kontra moras sira ne’e”, sujere nia.
Tanba ne’e, nia husu ba inan aman sira nafatin lori labarik tinan lima mai kraik ba simu vasina no imunizasaun integradu iha postu vasina sira ne’ebé mak besik atu nune’e hodi hasa’e sia nia imunidade hodi kontra moras sira.
Jornalista : Felicidade Ximenes
Editór : Zezito Silva
