PNTL sei koloka ofisiál polísia eskola na’in-rua ba ESG Dom Martinho-Malibaca

BOBONARO, 01 fevereiru 2023 (TATOLI) – Polísia Nasionál Timor-Leste (PNTL), Munisípiu Bobonaro sei koloka membru Ofisiál Polísia Eskola (OPE) na’in-rua ba iha Ensinu Sekundária Jerál (ESG, sigla portugés) númeru I Dom Martinho da Costa Lopes Maliana no Tékniku Vokasionál Númeru II Malibaka Yamato lokaliza iha SoSo, Maliana.

Komandante Polísia Munisípiu Bobonaro, Superintendente Polísia, Antoninho Mauluta, hateten prezensa membru OPE na’in-rua ne’e atu halo koordenasaun serbisu ho diretór eskola no profesór sira hodi kontrola situasaun seguransa iha eskola rua refere.

“Ohin diretór eskola rua mai koordena ho ami ona, bainrua dadeer ami sei lori ofisiál polísia eskola na’in-rua ba intrega direita ba iha eskola Dom Martinho no eskola Malibaca na’in-rua mak sai nu’udar polísia eskola nian,” Mauluta informa asuntu ne’e ba jornalista sira, iha Maliana, tersa ne’e.

Tuir nia, estabelese OPE na’in-rua ne’e, tanba identifika katak eskola rua refere durante ne’e iha prosesu aprendizajen la’o dalaruma sempre mosu konflitu entre estudante ho estudante no ema li’ur ho estudante sira.

“Ita nomea membru na’in-rua ne’e ba iha-ne’ebá oinsá bele asegura situasaun, wainhira estudante sira mai eskola karik bele lori di’ak mestre sira hanorin ho di’ak no hakmatek no labele ta’uk, tanba oras ne’e daudaun Dom Martinho estudante balu ta’uk de’it situasaun, lakohi mai tiha ona eskola,” nia haktuir.

Membru OPE na’in-rua komandu polísia munisípiu Bobonaro orienta halo kontrolu rútina molok estudante sira hala’o prosesu aprendizajen hosi parte dadeer no lokraik sai eskola atu nune’e bainhira akontese problema rua bele identifika lalais autór sira-ne’ebé tenta perturba prosesu aprendizajen.

“Ha’u-nia lia-menon ba ita-nia estudante sira, katak imi mai iha fatin ne’e atu estuda, la’ós fatin mai atu buka problema, la’ós fatin mai atu buka malu grupu hodi asalta malu. Ida-ne’e lae, maibé fatin ita atu aprende sai matenek,” Maluta fó hanoin

Entretantu orientasaun komandu membru OPE na’in-rua ne’e mós sei fasilita atividade extra-kurrikuler sira hanesan marsa orden unida no jimnástika, maibé depende ba nesesidade eskola rua nian.

Jornalista    : Sérgio da Cruz

Editór           : Evaristo Soares Martins