DILI, 02 fevereiru 2023 (TATOLI)— Autoridade Inspesaun Fiskalizasaun Etividade Ekonómika no Sanitária Alimentár, Institutu Públiku (AIFAESA,I.P), tinan ne’e, sei hetan karreta laboratóriu movel gratuita ida hosi Embaixada Indonézia ka Kedutaan Besar Republik Indonesia (KBRI).
Inspetór Jerál AIFAESA,I.P Ernesto Monteiro, hateten, sira-nia parte atu hetan karreta laboratóriu movel ne’e realasiona no sira-nia kooperasaun di’ak liu hosi South-South Cooperation (SSC) nune’e sira oferese karreta movel ne’e ba AIFAESA,I.P.
“Timor-Leste sei hetan karreta unidade laboratóriu movel ida ho gratuitamente hosi KBRI, no AIFAESA,I.P mak sei responsabiliza hare ba nia manutensaun sira,” Ernesto Monteiro dehan ba Agência Tatoli, kuarta ne’e.
Nia dehan, ba karreta labotaróriu movel ne’e rasik bainhira mak mai seidauk hatene nia data fiksu, maibé ho apoiu ida ne’e sei fasilita AIFAESA nia servisu halo inspesaun ba produtu kualidade.
Antes ne’e, AIFAESA,I.P prevee orsamentu $40.000 atu halo akizasaun ba unidade laboratóriu movel ba ne’e, maibé, to’o agora seidauk bele halo prosesu akizasaun tanba laboratóriu refere ho nia folin to’o $60.000.
“Ida ne’e la inklui ekipamentu interior ne’ebé atu koko kualidade produtu, ne’ebé orsamentu nune’ebé antes ne’e ita tau ona uza fali ba laboratóriu ninia manutensaun no uza ba kapasitasaun rekursu umanu ne’ebé sei halo iha Indonézia,” nia dehan.
Ernesto Monteiro hateten, existénsia ho laboratóriu movel ne’e, sei halo kontrolu produtu ba munisípiu hotu, ho objetivu halo teste kualidade ba produtu nune’e labele fó risku ba konsumidór sira.
Jornalista : Arminda Fonseca
Editora : Armandina Moniz
