DILI, 06 fevereiru 2023 (TATOLI)– Ministru Finansa, Rui Gomes, informa Programa Reziliénsia Komunitáriu Faze I no II ne’ebé estabelese liuhusi kooperasaun entre Governu Timor-Leste no Austrália hodi finansia konstrusaun projetu infraestrutura eskala ki’ik benefisia ona suku 390 husi totál 452 iha Timor-Leste.
“Investimentu signifikante ne’e benefisia ona suku 88% ho totál projetu eskala ki’ik hamutuk 419 ne’ebé kompostu husi projetu bee-moos no saneamentu hamutuk 230, estrada no ponte hamutuk 106 no seluk tan,” Ministru Rui Gomes hateten iha nia Diskursu iha Serimónia Asinatura Apoiu Osamentu Direta husi Governu Austrália ba Programa ‘Resiliénsia Komunitária no Rekuperasaun Ekonómika ba Timor-Leste durante pandemia covid-19 faze datoluk iha Auditóriu Kay Rala Xanana Gusmão, Ministériu Finansa.
Governante ne’e hatutan, dezde juñu 2022, benefisiáriu 13.354 husi munisípiu Ainaro, Bobonaro no RAEOA mós simu ona pagamentu Bolsa da Mãe Jerasaun Foun (BdMJF) hafoin Governu lansa programa ne’e.
“Apoiu ne’e importante tebes hodi lori mudansa pozitivu ba inan isin-rua sira no labarik deznutrisaun ne’ebé antes ne’e la inklui iha planu hanesan ne’e”, Rui Gomes afirma.
Ho baze ba susesu husi pakote finansiamentu anteriór rua ho totál dolár australianu millaun $27 (2020 millaun AU$7 no 2021 millaun AU$20), Governu Austrália deside hodi oferese tan adisionál millaun AU$20 ba tinan 2023, nune’e montante totál hamutuk millaun AU$47.
Husi millaun AU$20 (kuaze millaun US$14) ba tinan 2023, millaun $4,7 sei kontinua hodi finansia programa PNDS no sei distribui ba suku 452 iha territóriu tomak.
Enkuantu, orsamentu millaun $7,05 sei aloka ba Bolsa da Mãe Jerasaun Foun no rihun $870 sei aloka ba Programa Mobilidade Laborál hodi haruka timoroan sira bá serbisu iha Austrália inklui apoiu kontínuu ba traballadór timoroan sira ne’ebé mak fila husi Austrália mai Timor-Leste atu reintegra iha atividade ekonómika.
“Orsamentu ne’e sei transfere diretamente ba iha Konta Tezouru Estadu Timor-Leste nian ne’ebé jere husi Ministériu Finansa. Ida ne’e hatudu sinál konfiansa ne’ebé Governu Austrália fó mai iha sistema Tezouru Timor-Leste no kumpre prinsípiu Polítika Ajuda Esterna Governu Timor-Leste”, Rui Gomes hatutan.
Orsamentu ne’e hamutuk ho alokasaun OJE 2023 ba programa PNDS no BdMJF, bele ajuda Governu Timor-Leste alkansa nia kompromisu globál relasiona ho empregu inklui alkansa Objetivu Dezenvolvimentu Sustentavel númeru 8 (Traballu Dignu no Kresimentu Ekonómiku) no númeru 5 (Igualdade Jéneru) husi Ajenda Dezenvolvimentu Sustentavel 2030.
Jornalista : Antónia Gusmão
Editora: Maria Auxiliadora
