DILI, 07 fevereiru 2023 (TATOLI) – Komandu FALINTIL-Forsa Defeza Timor-Leste (F-FDTL) deside hasai kadete na’in-ida ho inisiál NM tanba antes ne’e komete krime ómesidiu.
Xefe Estadu Maiór Jenerál (F-FDTL), Tenente Jenerál Domingos Raul Falur Rate Laek, hatún ona despaixu hodi hasai kadete na’in-ida iha Sentru Formasaun Treinamentu Komandante Nicolau Lobato Metinaro, tanba antes ne’e envolve iha kazu ómesidiu.
Tanba ne’e iha loron tersa 7/02 kadete refere labele partisipa iha serimónia graduasaun ba membru F-FDTL foun iha Sentru Formasaun Treinamentu Komandante Nicolau Lobato Metinaro.
Kadete ho insiál NM envolve iha krime tentativa omesídiu hodi taa nia kolega NdS iha 2020.
“Horseik kedan ha’u hatún despaixu hodi kadete foun ne’e labele tuir serimónia graduasaun ba membru F-FDTL foun, ne’ebé ohin ita relaiza ne’e signifika nia la’os ona membru F-FDTL foun, tanba ne’e orden krime”, Tenente Jenerál Domingos Raul Falur Rate Laek, dehan ba jornalista sira bainhira remata serimónia graduasaun ba membru foun 2022, iha sentru treinamentu Nicolau Lobato Metinaro, ohin.
“Ita triste oituan, tanba ita inevste tiha ema durante fulan neen, halo ezersísiu maka’as, Estadu mós inevste ba hahán, farda, maibé krime ona, prontu ita entrega ba tribunál, tanba ita ema la halai ses husi justisa”, nia afirma.
Falur hateten, hafoin Komandu F-FDTL halo tiha desizaun hodi hasai tiha kadete foun ne’e iha segunda (6/02) horseik, Komandu F-FDTL entrega nia ba Polísia Militár hodi asegura kedan kadete ne’e iha sela polísia militár hodi hein entrega ba Polisia Nasionál Timor-Leste (PNTL) hodi lori kadete refere ba prizaun.
“Ohin família akompaña hosi nia advogadu, PNTL, lori ona kadete ne’e bá kadeia tanba mandadu hosi Tribunál sai no horseik ha’u lee ne’e katak kadete ne’e akuzadu ba krime tentativa omesídiu no krime arma branka ne’ebé taa kotu nia kolega ida nia lima”, nia esplika.
Hatan kona-ba tanba sa maka Komandu F-FDTL lakohi foti medida antes ba kadete ne’e, Tenente Jenerál Falur dehan, hanesan Komandu nia mós preokupa ho kestaun ne’e.
“Ha’u preokupa no hirus ba asesór jurídiku sira no sira ne’ebé ba rekursu pesoál tanba sa antes ne’e ita bo’ot sira la dehan, to’o Estadu investe tiha esforsu lubuk ida mak ba hasai fali ida ne’e mak ha’u triste”, nia konklui.
Jornalista : Felicidade Ximenes
Editór : Zezito Silva
