OÉ-CUSSE 08 fevereiru 2023 (TATOLI) – Estudante hamutuk na’in-449 iha Rejiaun Administrativa Espesiál Oé-Cusse Ambeno (RAEOA) daudaun ne’e submete ona sira-nia dokumentu ba ekipa Fundu Dezenvolvimentu Kapitál Humanu (FDCH) hodi asesu bolsa estudu hakbiit no bolsa estudu parsiál.
Diretór Nasionál Administrasaun Finansa no Rekursu Humanu iha FDCH, Evaristo Morais Pinto, informa, dadus ne’e rejista iha loron rua nia laran, nune’e iha futuru sei mudansa tanba loron tuir mai ekipa sei halo inskrisaun mós iha sub-rejiaun Nítibe, Oésilo no Pássabe.
Tanba kada tinan FDCH estabelese bolsa estudu hakbiit ho bolsa estudu parsiál ba joven sira-ne’ebé remata ona estudu iha ensinu sekundáriu no tékniku vokasionál, nune’e iha tinan ne’e kontinua, no ekipa hosi FDCH desloka ona iha munisipíu hotu-hotu inklui Atauro hodi halo inskrisaun ba estudante sira, hahú hosi loron 6 to’o 14 fevereiru ne’e.
“Iha RAEOA ohin ita halo inskrisaun ba loron datolu, loron dahuluk ami simu ona estudante 68, loron daruak simu tán 381, mai hosi bolsa hakbiit no parsiál, no iha loron datoluk ohin, ami sei komntinua ba sub-rejiaun Nítibe depois sei kontinua ba Oésilo no Pássabe,” Evaristo Morais, informa ba jornalista sira iha Oé-Cusse, kuarta ne’e.
Diretór nasionál ne’e fundamenta, prosesu inskrisaun ne’e loke ba públiku, tanba FDCH nia programa ne’e atu atinje meta ne’ebé termina ona iha planu, entaun bainhira halo remata atividade inskrisaun, sei kontinua ba selesaun dokumentu, tanba tuir planu FDCH nian iha 2023 ne’e, sei presiza bolsa hakbiit 1.600, no bolsa parsiál sei presiza 300.
Tuir nia, kritéria atu asesu bolsa estudu hirak ne’e maka tenke sidadaun Timor-Leste, idade mínimu 15 to’o 25 no remata ona ensinu sekundáriu jerál no tékniku vokasionál, tanba bolsa hakbiit ne’e oferese liu ba inan-aman ne’ebé kbiit ekonomia menus.
“Lei termina ona katak, sei la fó ba ema hotu-hotu maibé ida-ne’e atu fasilita kbiit laek sira atu kontinua sira-nia estudu,” nia katak.
Nia garante iha prosesu inskrisaun ne’e la’o ho susesu tanba ekipa FDCH servisu hamutuk ho Autoridade RAEOA, nune’e informasaun ne’ebé autoridade propoin, sei garante no laiha irregularidade.
“Karik akontese funsionáriu nia oan mós tama iha bolsa ne’e, nia prosesu ita sei halo re-verifikasaun halo analiza fila-fali hodi garante bolsa ne’e merese ba ema ne’ebé hetan,” nia afirma.
Nia esplika, prosesu inskrisaun ne’e iha ona kaléndariu, bainhira remata atividade inskrisaun ekipa juri sei halo avaliasaun dokumentu sira-ne’ebé maka estudante submete ona iha FDCH, depois sei halo verifikasaun finál, nia rezultadu ne’e foti desizaun hosi ekipa juri.
“Entaun iha fulan-marsu hanesan ne’e, nia rezultadu bele anunsia ona atubele fasilita ona estudante sira ba konstinua estudu iha nível universitáriu, tanba prosesu aprendizajen daudaun ne’e la’o ona,” nia katak.
Jornalista: Abílio Elo Nini
Editór: Evaristo Soares Martins
