SEAK apoiu fundu $100.000 ba konstrusaun uma-lulik 50
DILI, 08 fevereiru 2023 (TATOLI)–Sekretáriu Estadu Arte no Kultura (SEAK), Teofilho Caldas, hateten Governu liuhosi SEAK apoiu hodi prevee orsamentu $100.000 atu apoiu halo konstrusaun uma lulik 50 iha territóriu nasionál.
Notísia Relevante: Governu apoiu $100.000,00 ba konstrusaun Uma-lulik
“Orsamentu $100.000 ne’ebé ita kontinua prevee iha tinan ida-ne’e atu fó prioridade liu ba uma lulik sira-ne’ebé mak afeta dezastre naturál hanesan inundasaun no ahi han une’e hamutuk uma lulik 50 iha territóriu nasionál,” Governante ne’e hateten ba jornalista sira hafouin ramata reuniaun Konsellu Ministru iha Palásiu Governu, kuarta ne’e.
Nia dehan, hosi uma lulik 50 ne’e SEAK fó mós prioridade ba uma lulik ida hosi Lospalos tanba antes ne’e komunidade sira mak husu ona ba Primeiru-Ministru, hafoin mak SEAK sei haree mós uma lulik sira seluk ne’ebé mak afetadu ba dezastre naturál.
Tuir nia, apoiu fundu ne’ebé SEAK prevee ona ba uma lulik sira-ne’e no ninia prosesu la’o tuir medida baibain haree hosi kategoria ne’ebé la hanesan.
Nia esplika, uma lulik sira-ne’ebé mak harii foun ne’e SEAK sei apoiu orsamentu $3.500 tanba Governu labele halo uma lulik ba komunidade, se lae ninia valor ne’e lakon ona.
“Governu ajuda de’it atu halo kmaan de’it todan ne’ebé mak ita-nia komunidade enfrenta,” nia dehan.
Agora haree kona ba prosesu reabilitasaun ba uma lulik sira-ne’e, Governu sei apoiu orsamentu $2.500, enkuantu inaugurasaun ba uma lulik mós sei hetan apoiu orsamentu kuaze $1.500 tanba kustu inaugurasaun ne’e ninia lójika ne’e mak $1,500 ne’e.
Entretantu, ko’alia kona-ba dadus uma lulik sira-ne’ebé mak Governu apoiu hosi 2019 to’o 2022 hamutuk uma lulik 100-resin ona, maibé prosesu apoiu ne’e mak tenke la’o tuir prosedimentu ne’ebé iha mak hanesan konstrusaun no reabilitasaun uma lulik ne’e, laiha intervensaun ida hosi Governu liu-liu medida uma lulik sira-ne’e halo kontinua la’o tuir nafatin modelu hosi bei’ala sira nian.
Tanba, tuir nia, Governu hakarak kontinua prezerva hodi defende nafatin orijinalidade patrimóniu kulturál, entaun SEAK lakohi interven atu nune’e komunidade bele mantein nafatin modelu sira-ne’ebé mak bei’ala sira husik hela ba sira.
Notísia Relevante: Konstrusaun uma lulik iha Timor-Leste 75% uza materiál tradisionál
Jornalista : Tomé Amado
Editór : Cancio Ximenes
