MAP apoia rihun $43 ba grupu 10 iha Ban Afi-Usitasa’e ezekuta projetu HAPAS
OÉ-CUSSE 09 fevereiru 2023 (TATOLI) – Ministériu Agrikultura no Peska (MAP) liuhosi Diresaun Rejionál Agrikultura iha Rejiaun Administrativa Espesiál Oé-Cusse Ambeno (RAEOA), kuarta ne’e apoia fundu $43.200 ba grupu 10 iha suku Usitasa’e no Ban-Afi hodi implementa projetu Hasa’e Produtividade Agrikultura Sustentavél (HAPAS) ba etapa dahuluk iha períodu 2023.
Sekretáriu Rejionál ba Asuntu Agrikultura, José Eta informa, iha suku Ban-Afi, sub-rejiaun Nítibe iha grupu lima ho totál valór fundu implementa aktidade haki’ak fahi hamutuk $22.500, hanesan grupu Tua-Peas simu fundu $4.500, grupu Kua’feu hetan fundu $4.500, grupu Tafnekan-Nabalah hetan fundu $4.500, grupu Tafen-Bitetu hetan fundu $4.500 no grupu Oécolo hetan fundu $4.500.
Nune’e mós iha suku Usitasa’e iha sub-rejiaun Oésilo, iha grupu lima ho implementa atividade pekuária, hakiak fahi no manu, ho totál fundu hamutuk $20.700 hanesan grupu Tua-Lele hetan fundu $3.600, grupu Binibu hetan fundu $3.600, grupu avansa hetan fundu $4.500, grupu Mantanas hetan $4.500 no grupu Falo-Taum hetan $4.500.
“Hosi suku rua ne’e kada suku envolve komunidade uma-kain 150, kada grupu akumula benefisiáriu 30,” José Eta, informa ba Agência Tatoli iha Oé-Cusse kinta ne’e.
José Eta, fó sai katak, iha Oé-Cusse suku neen mak sai alvu ba projetu HAPAS, hanesan iha sub-rejiaun Oésilo, suku Usitasa’e, Bonbometo no Usitaqueno, iha Pássabe suku Malelat, iha Nítibe suku Ban-Afi no iha sub-rejiaun Pante Makasar maka suku Naimeko,”
Entretantu, dadus ein-jerál ba períodu2023, iha Oé-Cusse totál benefisiáfriu hamutuk 1.010, halo agrupamentu ba grupu 30 kada grupu envolve ema nain-30 to’o 40 maka partisipa direita iha programa HAPAS ne’e ho totál fundu hamutuk $160,957.50.
Purtantu, iha 16 novembru 2016 Governu Timor-Leste liuhosi Ministériu Agrikultura no Peska (MAP) selebra akordu ida ho Banku Mundiál hosi NasaunUnida kona-bá implementasaun projetu Hasa’e Produtividade Agrikultura Sustentavél (HAPAS) ka Sustanable Agrikulture Produktivity Improvement Project (SAPIP) iha Timor-Leste.
Projetu ne’e Ministériu Agrikultura no Peska (MAP) ho Banku Mundiál, hahú halo lansamentu iha 29 setembru 2017, munisípiu hitu (7) maka sai alvu iha implementasaun faze dahuluk, hanesan basia idrográfika Be-Lulik, realiza iha munisípiu Ainaro no Covalima, baxia idrográfika Loes, realiza iha munisípiu Ermera no Bobonaro, baxia idrográfika Raumoco, realiza iha munisípiu Lautem, no baxia idrográfika Tono, realiza iha Rejiaun Administrativa Espesiál Oé-Cusse Ambeno (RAEOA).
Projetu ne’e implementa hosi Ministériu Agrikultura no Peska (MAP) hetan finansiamentu fundu hosi Programa Seguransa Ai-han no Agrikultura ka Global Agrikultura and Food Security Programe (GAFSP) ho montante millaun $21. Ne’ebé ezekuta mai hosi parseiriu sira iha Banku Mundiál nian, hanesan Organizasaun Sosiedade Sivíl-sira, no Organizasaun Nasaun Unida nian ba Ai-haan no Agrikultura (FAO), ho durasaun tinan lima, hahú 2017 to’o 2022
Objetivu hosi projetu ne’e, atu hadi’a produtividade agrikultór ki’ik-sira, no fó tulun atu fa’an produtu sira-ne’ebé grupu agrikultór sira prodús, liuhosi planu dezenvolvimentu nian, hanesan atividade pekuária no veternária, ortikultura no indústria inovativu, ida-ne’ebé atu ezekuta iha zona munisípiu 7, Lautem, Ainaro, Covalima, Liquiçá, Ermera, Bobonaro no RAEOA.
Jornalista: Abílio Elo Nini
Editór: Evaristo Soares Martins
