Ministru Armindo husu deputadu relata dadus reklamasaun bolsa méritu ba MEJD
DILI, 14 fevereiru 2023 (TATOLI)–Ministru Edukasaun Juventude no Desportu (MEJD) Armindo Maia, husu deputadu sira iha Parlamentu Nasionál atu bainhira simu reklamasaun ruma hosi inan-aman sira kona ba asuntu bolsa méritu di’akliu relata mai Ministériu Edukasaun atu bele halo prosesu.
Notísia Relevante: MEJD sei halo justifikasaun bainhira pagamentu bolsa méritu la konklui
“Hanesan ha’u hateten ona reklamasaun kona-ba bolsa méritu ne’e parte Ministériu Edukasaun rejista ona hamutuk 10, maibé karik deputadu sira mós simu reklamasaun kona-ba bolsa méritu hosi inan-aman sira bele haruka mai ami iha Ministériu atu nune’e ami bele prosesa hodi halo verifikasaun,” Ministru Armindo Maia hatán ba deputadu sira-nia preokupasaun iha plenária Parlamentu Nasionál, tersa ne’e.
Asuntu bolsa méritu ne’ebé mak Ministériu Edukasaun sei atribui ba estudante mellór klasifikadu hamutuk 13.517 ne’e haree hosi parte rua, mak primeiru haree hosi aproveitamentu eskolár hosi nota ezame pasajen siklu ka pasajen de klase ne’ebé refere ba kuatru ano primeiru siklu ensinu báziku, sestu ano hosi segundu siklu ensinu báziku no désimu primeiru ano hosi ensinu sekundáriu jerál no tékniku vokasionál.
Nune’e mós, bolsa méritu ne’ebé sei atribui ba estudante ensinu báziku terseiru siklu nono ano no ensinu sekundáriu jerál no tékniku vokasionál désimu segundu ano ne’e, haree hosi valór reál ne’ebé mai hosi ezame nasionál nian de’it.
Ne’ebé, nia dehan, estudante sira-ne’ebé finalista ne’e sira-nia nota atu termina hodi hetan bolsa méritu ne’e mai hosi valor ne’ebé mak kurije mákina eletrónika ne’ebé Ministériu edukasaun prepara ona.
“Ita-nia estudante finalista hosi ensinu báziku nono ano no estudante désimu segundu ano hosi ensinu sekundáriu jerál no tékniku vokasionál atu hetan bolsa méritu ne’e sira-nia valór foti de’it hosi ezame nasionál ne’ebé la soma tan ho valór sira-ne’ebé mak antes ne’e sira prodús. Kuandu iha ezame nasionál maka sira-nia valór ki’ik, ida ne’e mak realidade,” nia dehan.
Tanba ne’e, membru VIII Governu konstitusionál ne’e husu ba deputadu sira hotu atu kontinua fó nafatin informasaun mai Ministériu bainhira simu keixa ka reklamasaun hosi benefisiáriu sira, hodi nune’e bele ajuda malu atu rezolve asuntu sira-ne’e.
“Ha’u hatene deputadu sira-ne’e kaer asuntu polítiku maibé ha’u husu karik simu reklamasaun hosi inan-aman estudante sira, di’akliu delega mai ami tékniku sira tanba ami hatene liu asuntu sira-ne’e karik iha buat balun mak ami seidauk halo di’ak deputadu sira bele kontinua fó nafatin hanoin mai ami atu bele hadi’a,” nia hateten.
Deputada bankada FRETILIN, Josefa Pereira, informa katak sira simu ona reklamasaun balun hosi inan-aman balun mai hosi eskola Paralela ida iha Oé-Cusse iha estudante na’in-rua hetan valór di’ak maibé sira la tama iha benefisiáriu atu hetan bolsa méritu.
Deputada ne’e hateten, iha estudante na’in-rua ne’e ida mak ninia valór hetan 115 depois iha matéria ida mak hafoer tiha ho tipex asuntu ne’e agora to’o ona iha Parlamentu nasionál, tanba ne’e presiza atu halo investigasaun.
Tuir nia, estudante ida hetan valór 115 ne’e kada matéria hetan sia (9) hotu maibé nia konsidera valór hanesan bele iha ona manipulasaun.
“Ami mós uluk mai hosi background profesór maibé matéria hotu mak estudante ne’e hetan hotu valór sia (9) ne’e ha’u bele dehan susar,” nia hateten.
Nia husu ba Ministru mós atu trata asuntu ne’e ho sériu tanba sira deputadu hotu simu ona reklamasaun, ne’eduni presiza atu halo mós investigasaun ruma atu bele haree asuntu ne’e.
Tanba, nia dehan, se lae bele hamosu hela polémika entre eskola ho Ministériu Edukasaun inklui Parlamentu Nasionál rasik.
Notísia Relevante: PN bolu urjente Ministru Edukasaun atu esplika implementasaun bolsa méritu
Jornalista : Tomé Amado
Editór : Cancio Ximenes
