MS-OMS avalia servisu autoriedade reguladora ba aimoruk iha TL
DILI, 14 fevereiru 2023 (TATOLI) – Ministériu Saúde (MS) hamutuk ho Organizasaun Mundiál Saúde (OMS) iha Timor-Leste halo avaliasaun no levantamentu ba servisu autoriedade reguladora ba aimoruk.
“Atividade ida ne ‘e la’os foin mak halo, maibé ida ne’e ba daruak nian hodi halo avaliasaun no levantamentu ba servisu autoriedade reguladora ba aimoruk iha TL, entaun ita halo avaliasaun ida ne’e atu hatene ita-nia servisu no oinsá mak ita bele regula aimoruk sira ne’ebe ita lori mai ita nia rain”, Minsitra Saúde Odete Maria Freitas Belo, dehan ba jornalista sira iha Hotel Novo Turismu, ohin.
Nia dehan, ho avaliasaun ne’e atu kontrola aimoruk iha Timor-Leste liuliu iha armajen sira ne’ebé mak SAMES kompras, entaun ho péritu sira husi Ziaro no Australia nia prezensa atu ajuda MS nia servisu ba reguladór aimoruk sira iha TL.
“Servisu sira ne’e, MS halo mak ekipa sira nafatin kontrola ba faramsia privada, ospitál sira kona-ba aimoruk sira ne’ebé mak iha ne’e kualidade ka lae, tanba ita uza rekomendasaun sira ne’ebé uluk, entaun ho avaliasaun ne’ebé iha, ita sei hetan valór ne’ebé di’ak hodi kompara ho antes. Tanba levantamentu ida ne’e, sira sei haklean husi baze legál, dokumentu, to’o polítika ne’ebé mak MS iha hodi fó lisensa, atu importa aimoruk mai tanba MS mak iha kompeténsia hodi fo kna’ar ba SAMES atu rai aimoruk, entaun ida ne’e mak ita halo avaliasaun fila fali hamutuk ho peritu sira husi ZIARO no mós husi Australia nia”, nia esplika.
Iha fatin hanesan reprezentante OMS iha Timor Leste, Arvind Mathur, hateten levantamentu servisu autoriedade reguladora ida ne’e sei sai hanesan avaliasaun daruak ba Timor-Leste ne’ebé hala’o husi ekipa peritu ka asesor esternu sira hosi OMS SEARO, OMS headquarters no Autoriedade nia lista OMS nian ne’ebé mai hodi avalia kapasidade téknika hosi Autoriedade Reguladora Nasionál Timor-Leste.
“Ha’u kontente atu dehan katak avaliasaun ne’e hetan kada funsaun reguladora iha nivél maturidade ida, maibé sei nafatin menus profissionál tékniku no kapasidade ne’ebé mínimu ho nune’e mak presenza husi peritu sira sei hadia liután servisu ida ne”, Arvind Mathur afirma.
Nune’e, parseiru Estratéjiku no lideransa ba implemnetasaun programa fortalesimentu regulatóriu Indo-Pasífiku Paul Huleatt, dehan husi Adminsitarsaun Reguladora Australia nafatin tulun Timor-Leste liuliu MS atu melhora no hadia liután servisu regulatóriu nasionál ba aimoruk nian.
“Ami husi administrasaun reguladora husi Austrália nafatin tulun Timor-Leste oinsá atu melhora no hadia liután servisu regulatóriu nasionál ba aimoruk nia iha Timor-leste tanba ami nafatin apoiu MS ba iha laboratóriu atu bele teste nafatin medikamentu iha futuru”, Paul Huleatt konklui.
Jornlaista : Felicidade Ximenes
Editór : Zezito Silva
