PNDS realiza formasaun iha Oé-Cusse kona-bá alterasaun dekretu-lei sira
OÉ-CUSSE 14 fevereiru 2023 (TATOLI) – Programa Nasionál Dezenvolvimentu Suku (PNDS), tersa ne’e realiza formasaun resiklazen ba funsionáriu sira iha Rejiaun Administrativa Espesiál Oé-Cusse Ambeno (RAEOA) Manuál Operasaun Programa (POM) bá revizaun dekretu-lei PNDS nian.
Diretór Administrasaun Finansa PNDS Nasionál, Bertolomeu Dias Tilman, hatete, formasaun ne’e realiza durante semana ida, ho matéria iha area tolu, ba finansa sei formasaun kona-bá ezekusaun orsamentu no prosesu aprovizionamentu, tékniku kona-bá implementasaun programa dezeñu Bill Of Quantity (BoQ) no sosiál nian kona-bá aprosimasaun ba komunidade atu partisipa másima iha programa PNDS.
“Ohin treinamentu (formasaun) ita hala’o iha Oé-Cusse ba funsionáriu PDNS tomak, ne’e formasaun reziklazen ida, la’ós buat foun. Ne’e hotu ligadu ho ita-nia alterasaun dekretu-lei PNDS nian hanesan POM,” Bertolomeu Dias Tilman, dehan ba Agência TATOLI iha Oé-Cusse.
Diretór Finansa Nasionál hosi PNDS ne’e, esplika, dekretu-lei PNDS altera ba dala haat ona, primeiru dekretu-lei nú.8/2013, 26 juñ, depois dekretu-lei nú.94/2022, 28 dezembru, tanba iha mudánsa balu, entaun agora daudaun halo revizaun iha mata dalan ba PNDS nian maka hanaran POM.
“Iha matéria barak maka halo revizaun iha ne’ebá, hanesan programa ho nia prosesu tomak, orsamentu, no estrututura PNDS nian, nune’e funsionáriu sira presiza iha koñesimentu di’ak atu nune’e kontinua implementa fila-fali ba iha terrenu,” nia informa.
Nia hatutan, formasaun ne’e la’ós realiza iha Oé-Cusse de’it, maibé realiza mós iha munisipíu 13, bainhira remata formasaun ne’e iha munisipíu, bele trasa planu atu hahú tún ba terrenu hodi sosializa ba nível suku.
Nia akresenta, dekretu-lei ne’e iha mudánsa balun, liuliu maka programa, hanesan 2022 iha atividade ida-de’it, maka Jestaun Programa Dezenvolvimentu Suku maibé iha tinan ne’e iha atividade rua, Jestaun Programa Dezenvolvimentu Suku no abitasaun sosiál kona-bá Uma Naroman ba Povu (UNP).
“Entaun presiza iha dekretu-lei balu bele asegura programa sira-ne’e, tán ne’e atividade ne’e hanesan divulgasaun balu ba funsionáriu sira, hodi intende didi’ak atubele kontinua sosialiaza iha nivél suku antes implementa,” nia afirma.
Entretantu, totál funsionáriu implementa Porgrama Nasionál Dezenvolvimentu Ssuku iha Oé-Cusse hamutuk na’in-19.
Jornalista: Abílio Elo Nini
Editór: Evaristo Soares Martins
