WorldFish TL koordena Autoridade atu harii investimentu peska iha Oé-Cusse

OÉ-CUSSE 14 fevereiru 2023 (TATOLI) –WorldFish Timor-Leste (TL), tersa ne’e hala’o enkontru koordenasaun ho Autoridade Rejiaun Administrativa Espesiál Oé-Cusse Ambeno (RAEOA), kona-bá futuru atu harii investimentu peska nian liuhosi ikan adapt iha sub-rejiaun Pante Makasar no Nítibe.

Hafoin remata enkontru koordenasaun ne’e, Sekretáriu Rejionál ba Asuntu Agrikultura, José Eta, informa, ekipa WorldFish hasoru Autoridade RAEOA lidera hosi Prezidente Autoridade, Arsénio Paixào Bano, hodi aprezenta konseitu investimentu nian.

“Enkontru kortejia ohin ne’e, Autoridade simua audiénsia hosi WorldFish, ko’alia kona-bá área peska nian atu investe liuhosi ikan adapt iha Oé-Cusse, poténsia ba sub-rejiaun rua,” José Eta, dehan ba Agência Tatoli hafoin remata enkontru iha edifisíu ZEESM Oé-Cusse.

Nia informa, durante iha sorumutu, parte WorldFish mós aprezenta konseitu modelu investimentu ne’e, tanba iha interese atu halo investimentu iha área peska nian, tanba polítika iha futuru, daudaun ne’e WorldFish identifika ona fatin rua iha Oé-Cusse sai tarjetu ba implementasaun.

“Fatin ida iha suku Nipani iha sub-rejiaun Pante Makasar, fatin ida iha Citrana, sub-rejiaun Nítibe, ne’ebé ohin mai iha-ne’e ami deskuti daudaun,” afirma José Eta.

Nia informa, ekipa hosi WorldFish aprezenta konseitu investimentu ba área peska ne’e, mai hosi Diretór Nasionál Peska, Diretór Nasionál Meiu Ambiente no mós Diretór Nasionál ba Kontrolu Poluisaun.

“Iha buat rua, 75% investimentu ba fízika no 25% investimentu ba peskiza nian fokuliu ba área kosteira no área akikultura nian,” nia katak.

Jornalista: Abílio Elo Nini
Editór: Evaristo Soares Martins