Eskola ESG Hera seidauk iha profesór ba matéria dixiplina haat
DILI, 15 fevereiru 2023 (TATOLI)–Diretór Eskola Ensinu Sekundáriu Jerál (ESG) Hera, António Pinto, hateten eskola ensinu sekundária jerál (ESG, sigla portugés) Hera seidauk iha profesór atu apoiu matéria dixiplina haat iha prosesu ensinu aprendizajen ba estudante sira.
Notísia Relevante: Eskola Sekundária Jerál Hera presiza tan profesór 12
Diretór ne’e hatutan, agora daudaun sira iha matéria dixiplina haat mak laiha profesór maibé estudante kuaze 55 ne’ebé eskola iha fatin ne’e abandonadu besik fulan ida ona.
“Ami iha matéria dixiplina ne’ebé abandonadu hela mak Fízika, Kímika, Desportu no Lian Inglés, tanba ne’e ami presiza tan profesór na’in-ualu (8) hanesan ne’e atu mai reforsa iha ami-nia eskola ne’e,” nia dehan ba Agência Tatoli liuhosi telefónika, kuarta ne’e
Nia dehan, profesór na’in-ualu ne’ebé sira presiza ne’e atu koloka ba kada matéria ne’e na’in-rua (2), tanba hafoin eskola Ensinu Sekundáriu Tékniku Vokasionál (ESTV) Hera ne’e rekonverte fila-fali ba eskola Ensinu Sekundáriu Jerál (ESG) Hera ne’e seidauk iha profesór ba matéria haat ne’e.
Tanba ne’e, nia husu ba Ministériu Edukasaun Juventude no Desportu atu bele koloka ona profesór na’in-ualu iha área espesífiku sira-ne’e hodi mai reforsa prosesu ensinu aprendizajen ba estudante iha ESG Hera ne’e.
Entretantu, Ministru Edukasaun Juventude no Desportu (MEJD), Armindo Maia, hateten preokupasaun kona-ba menus profesór ne’e la’ós eskola Hera de’it maibé kuaze iha eskola hotu ne’e, nia parte sei kontinua halo ezersísiu atu buka solusaun hodi koloka profesór sira ba iha eskola sira-ne’e.
“Ha’u konsidera eskola sira preokupa ho profesór. Maibé, ha’u sei halo ezersísiu atu buka ninia solusaun tanba preokupasaun profesór menus iha eskola sira-ne’e kuaze iha territóriu nasionál,” nia dehan.
Notísia Relevante: MEJD rekonverte eskola TEKVOK ba ESG fó vantajen ba estudante sira
Jornalista : Tomé Amado
Editór : Cancio Ximenes
