Kampaña imunizasaun integradu Iha Bobonaro liu ona alvu
BOBONARO, 15 fevereiru 2023 (TATOLI)- Dadus atualizadu kona-ba programa kampaña nasionál imunizasaun integradu iha munisípiu Bobonaro ne’ebé lansa loron 12 janeiru to’o tersa loron 14 fulan-fevereiru ne’e atinje ona 100% tanba labarik na’in 11,418 mak partisipa ona nune’e hatudu katak liu ona alvu hosi totál labarik tinan lima mai kraik na’in-10,199 ne’ebé enumera.
Notísia relevante: Kampaña nasionál imunizasaun integradu iha Bobonaro atinje 58,3%
“To’o horisehik progresu hosi produtu lima ne’e ita hetan ninia rezultadu ne’ebé di’ak ita iha 100% liu, entaun munisipiu Bobonaro sai hanesan primeiru Lugar iha kampaña nasionál vasina integradu,” Xefe Departamentu Programatiku Servisu Saúde Munisípiu Bobonaro, Paulina de Assunção Deneire, informa ba jornalista sira iha Maliana, kuarta ne’e.
Nia subliña, progresu hosi rezultadu ne’e korresponde ba produtu lima mak hanesan vasina póliu (OPV) 112%, vasina Pnemococcal Conjugate Vaccine (PCV) 111,6%, sarampu Rúbela (MR) 109,7%, Vitámina (A) 109,1% no Albendazól 109,9%.
Maske rezultadu hatudu munisípiu Bobonaro okupa númeru dahuluk iha nível nasionál, Paulina dehan, pesoál saúde sira sei kontinua fó atendimentu ba labarik sira-ne’ebé seidauk konsege partisipa iha programa ne’e.
“Posiblidade ba labarik sira-ne’ebé eskola hanesan pre-eskolár, sira-ne’ebé mak la konsege vasina iha komunidade, entaun pesoál saúde sira halo advokasia ba inan-aman no profesór sira iha eskola hotu-hotu, depois direitamente fó asisténsia vasina no ai-moruk lumbriga vitamina (A) ba labarik sira-ne’ebé la simu iha uma, sira sei hetan iha eskola fali,” nia katak.
Paulina haktuir, durante implementasaun programa refere entidade hotu-hotu iha munisípiu Bobonaro apoia másimu tanba inan-aman sira lori labarik sira partisipa masimu iha postu vasinasaun.
Notísia relevante: Labarik 10,124 iha Bobonaro sai alvu simu imunizasaun integrada
Jornalista: Sérgio da Cruz
Editór: Evaristo Soares Martins
