Aban mate isin Orlando Martins no Riando Falo translada ba RAEOA
DILI,17 fevereiru 2023 (TATOLI) – Mate isin matebian Orlando Martins no Riando Falo, aban halo transladasaun ba Rejiaun Administrativa Espesiál Oe-cusse Ambeno (RAEOA), atu halo serimónia funerál.
Reprezentante família matebian nain-rua, Marcelo da Rosa, dehan prosesu transladasaun mate isin sei hala’o via Terrestre.
Marcelo da Rosa, hato’o agradesementu ba ekipa konjunta ne’ebé durante ne’e halo esforsu tomak liuliu PNTL husi Munisípiu Aileu, Ainaro, inklui Falintil Forsa Defeza Timor-Leste (F-FDTL), bomberus, seguransa negro, komunidade , juventude hadomi natureza no parte hotu ne’ebé kontribui makas hodi buka tuir subriñu na’in rua ne’e nia mate isin.
“Dala ida tan, ami laiha buat ida atu selu ita boot sira nia kolen, maibé inan feto ramelau mak sei selu ita boot sira nia kolen. Dala ida tan agradese wain inklui lia na’in sira ne’ebé esforsu tomak halo tuir ita-nia kultura ne’ebé ita-nia beiala sira husik hela”, Marcelo da Rosa afirma iha Mortuáriu.
Nia husu ba públiku atu labele halo espekulasaun informasaun sira iha media sosiál, husik ba parte kompetente halao sira nia servisu tuir kompeténsia ne’ebé sira iha.
Tuir observasaun jornalista iha terrenu katak prosesu outopsia matebian Riando Falo hotu ona iha loron kuarta lokraik, maibé mate isin sei rai hela iha mortuáriu tanba hein prosesu outopsia ba mate isin Orlando Martins, ne’ebé konklui iha orsida lokraik, nune’e aban dader aranka dala ida ba Oe-Cusse.
Jornalista : Felicidade Ximenez
Editór : Zezito Silva
