Prosesu kontinuasaun kazu iha Mole-Anan hein notifikasaun hosi MP
BOBONARO, 24 fevreiru 2023 (TATOLI) – Komandante Polísia Nasionál Timor-Leste (PNTL) Munisípiu Bobonaro, Superintendente Polísia Antoninho Mauluta, hateten atu kontinua prosesu ba kazu ne’ebé akontese iha aldeia Mole-Anan, suku Ritabou, postu administrativu Maliana, rezulta vítima Sabino Barreto lakon vida deskonfia oho hosi ema deskoñesidu no daudaun ne’e polísia sei hein hela notifikasaun hosi Ministériu Públiku (MP).
Komandante Mauluta haktuir, kazu ne’e rasik rejita ona iha MP hafoin identifika sidadaun feto na’in-ida ho inisiál (I) lori mai kedas presta deklarasaun iha komandu polísia munisípiu Bobonaro, maibé MP orienta PNTL liberta sidadaun refere tanba kazu ne’e konsidera la’ós fragante delitu
Notísia relevannte: Mauluta husu joven sira koopera ho PNTL Bobonaro kontrubui pás iha eleisaun parlamentár
“Agora Ministériu Públiku orienta ona mai ita liberta ona suspeitu, depois ita hein tán prosesu seluk, bainhira notifikasaun ruma mai iha MP atu halo kontinuasaun nia prosesu,” nia informa ba jornalista sira, iha komandu polísia Munisípiu Bobonaro.
Enkuantu mate-isin ne’e mós halo ona prosesu autópsia iha Hospital Nasionál Guido Valadares (HNGV), Bidau, Dili no iha semana kotuk no família haloot ona isin mate Sabino Barreto iha knua’a horikik fatin, tuir kultura no lisan Kemak nian.
“Hosi komandu atu pasa hela informasaun ba família tomak, liuliu matebian nian, hotu-hotu makmatek no mós husu apoiu ba katak sé maka hetan imformasaun ruma bele apoiu mai iha parte investigasaun nian nune’e ita bele aselera prosesu ne’e,” Komandante Mauluta apela.
Enkuantu tuir kronolojia hosi feen kaben Matebian Sabino Barreto idade 33 sai hosi uma iha domingu, semana rua kotuk, laiha informasaun ruma to’o ikus la fila ba uma no iha segunda loron 13 seman kotuk fámilia foin hetan vítima la tan hela ai-bubur besik iha uma sorin ho kondisaun laiha ona iis.
Hafoin simu informasaun parte investigasaun kriminál munisípiu Bobonaro tún kedas ba fatin akontesimentu hodi rekolla evidénsia hanesan telemovél vítima nia isin mate iha segunda semana kotuk, hafoin PNTL identifika kedas supseitu ho evidénsia telemovel vítima nian.
Notísia relevante: Membru efetivu PNTL Bobonaro la sufisiente koloka ba sentru votasaun 147
Jornalista : Sérgio da Cruz
Editór : Evaristo Soares Martins
