MS rejista na’in-tolu mate tanba moras dengue
DILI, 27 fevereiru 2023 (TATOLI) – Diretór Nasionál Saúde Públika iha Ministériu Saúde Frederico Bosco, relata iha janeiru no fevereiru nia-laran, ministériu rejista kazu dengue hamutuk 209, hirak ne’e na’n-tolu mak mate.
”Dadus semana kotuk, ita iha kazu dengue hamutuk 209, husi númeru ne’e mai hosi munisípiu hitu no na’in tolu mak mate ba kazu dengue”, nia dehan ba jornalista sira iha nia kna’ar fatin Caicoli, ohin.
Nia sublina, husi mate na’in-tolu ne’e, na’in rua husi Dili no na’in ida husi Lautem.
”Husi númeru 209 ne’e, kazu kaman iha 140, kazu moderadu iha 62 depois mai ho dengue grave iha na’in hitu, husi sira na’in hitu ne’e mak na’in tolu lakon vida”, nia hatutan.
Tuir nia, kazu dengue barak liu mak iha Dili, Postu Administrative Dom Alexo, Cristu Rei, Postu Administrativu Vera Cruz nno Nain Feto.
“Husi janeiru to’o fevereiru, dadus ne’ebé ha’u iha katak Munisípiu Dili mak kazu barak. Kazu hirak ne’e akontese iha Postu Administrativu Dom Aleixo ho totál 86, Cristo Rei 16, Postu Administrativu Vera Vruz na’in ualu no Nain Feto iha kazu tolu”, Frederico Bosco hateten iha nia kna’ar fatin Caicoli, ohin.
Nia subliña, kazu dengue husi Dili hamutuk 113, Baucau iha 55 kazu, Lautem iha 14 kazu, Liquiça sia, Viqueque sia, Bobonaro hitu no Manufahi rua, entaun totál hamutuk 209.
Nia rekorda, tinan kotuk mate ba dengue iha na’in 58, maibé foin fulan rua de’it na’in tolu ona mak mate. Entaun kazu hirak ne’e afeta ba labarik no mós ema boot.
“Kazu dengue maioria afeta liu ba labarik sira menus husi idade tinan ida mai kraik iha na’in haat, menus husi tinan lima mai kraik iha na’in 25, entre tinan 5 too 14 iha na’in 52, tinan 12 to’o 24 iha na’in 23 kazu, depois tinan 25 ba leten iha kazu na’in lima”, nia informa.
Maske nune’e, MS kontinua halo promosaun no fahe abate ba komunidade sira tanba estoke abate no malation daudaun ne’e sei sufisiente hodi halo prevensaun ba kazu dengue iha área risku sira.
Jornalista : Felicidade Ximenes
Editór : Zezito Silva
